'जाडोमा ब्ल्याङ्केट ल्याइदिन्छु भन्थ्यो’

होम कार्की/रवीन्द्र उप्रेती बर्दिया (महोत्तरी), अषाढ २२ - आँसु पनि रित्तिएछ क्यारे । ७२ वर्षीया रामपरी साहलाई मंगलबार अपराह्न भेट्दा यस्तै लाग्यो । इँटाको सानो घरभित्र रामपरी आफ्ना नातेदारसँग शोकमा डुबेकी थिइन् । आँखामा आँसु पनि थिएन । रुन सकेकी थिइनन् । मुख पूरै सुकेको थियो ।  ७५  वर्षीय पति पिरत साह भन्दै थिए, 'छोराको मृत्यु भएदेखि अन्न पनि खाएकी छैन ।' उनीहरूका २४  वर्षीय छोरा राकेशकुमारको मृत्यु भएको खबर सुनेदेखि नै यो परिवार शोकमा डुबेको छ । बर्दिया बन्चौरिया ३ महोत्तरीका साहको शनिबार बिहान साउदी अरेबिया रियादमा आगलागीमा मृत्यु भएको थियो । एसीमा विद्युत् सर्ट हुँदा उनीसहित ७ जनाको जलेर ज्यान गएको थियो । बाँकी ६ जना भारतीय नागरिक थिए ।  'दुई दिनअघि मात्रै छोरोसँग घर फर्कने विषयमा कुराकानी भएको थियो,' बुबा पिरतले भने, 'त्यतिखेर अहिलेसम्म म 'महाजनकै छोरा' भएको छ । तपाइँको छोरो भएपछि र्फकन्छु ।' उनले महाजनको छोराको अर्थ प्रस्टाए, 'छोरो साउदी गए पनि कमाएको एक पैसा हामीले पाएको छैन । कमाएको जति ऋण र ब्याज साहूलाई तिर्दैमा ठिक्क थियो । त्यसकारण आफूलाई 'महाजनको छोरो' भन्थ्यो ।'  उनको आफ्नो करार अवधि साउनमा सकिने भए पनि साहूको ऋण तिर्ने बाँकी रहेकाले अझ ५/६ महिना बसेर आउने बताएका रहेछन् । तीन वर्षअघि राकेशले स्थानीय साहूसँग १ लाख २० हजार सयकडा तीन रुपैयाँमा लिएका थिए । जसमा अब ६० हजारजति ऋण तिर्न बाँकी थियो । 'स्थानीय एजेन्टले मासिक ७ सय रियाल (१४ हजार रुपैयाँ) को तलब छ भनेर गएको थियो । तर त्यस्तो भएन,' उनले बताए, 'जम्मा महिनाको पाँच हजार रुपैयाँ पठाउँथ्यो । यो साहूको ऋण तिर्दै ठीक भयो ।'  उनी साउदीमा अल-सुवेनको सुपरमार्केटमा मालीको काम गर्थे । उनको मृत्युको खबर गाउँकै सँगै काम गर्ने वीरेन्द्र साहले सुनाए । शोकमा डुबेको परिवारलाई सहानुभूति दिन गाउँले आइरहेका छन् । सबैलाई आमा रामपरीको चिन्ताले सताएको छ । 'आमा, यो जाडोमा तपाईंलाई एउटा ब्ल्याङ्केट ल्याइदिन्छु भन्थ्यो । आउँदो जाडोमा पहिले जसरी कष्ट सहनुपर्दैन भन्थ्यो,' आमाले सकिनसकी भनिन्, 'मलाई ब्ल्याङ्केट चाहिएन, छोरो चाहियो ।'  यो परिवारको तीनमध्ये उनी कान्छा हुन् । जेठा गाउँमै साइकल बनाउँछन् । साउदी जानुअघि राकेश पनि यही गर्थे । परिवारले उनको शव छिटो ल्याइदिन अनुरोध गरेका छन् । 'कम्पनी मालिकसँग भेटघाट भइसकेको छ,' साउदीका लागि कार्यवाहक राजदूत हरिश्चन्द्र घिमिरेले भने, 'उनको शव छिटोभन्दा छिटो स्वदेश पठाउन र नियमअनुसार क्षतिपूर्ति दिलाउन दूतावास लागिपरेको छ ।'

कन्तिपुरबाट