'कर्मचारी नै सुराकी'

रौतहट, अषाढ २२ - तराईमा सशस्त्र संघर्षरत समूहभन्दा आफ्नै कर्मचारीबाट खतरा हुने गरेको कर्मचारीले गुनासो गरेका छन् । भूमिगत संगठनलाई मोबाइल नम्बर दिएर चन्दा माग गरी धम्की दिन लगाउने काममा कर्मचारी नै सक्रिय रहेको उनीहरूले प्रशासकसमक्ष बताएका छन् ।  प्रमुख जिल्ला अधिकारी हरिराज पन्तको कार्यकक्षमा मंगलबार जिल्लाका अधिकांश कार्यालय प्रमुख तथा कर्मचारीले सशस्त्र समूहबाट नभई आफ्नै कर्मचारीबाट खतरा हुने गरेको गुनासो गरेका हुन् । भर्खरै सरुवा भई आएका प्रजिअ पन्तले कर्मचारीसित परिचय कार्यक्रम गरेका थिए । 'कर्मचारीबाटै खतरा हुने गरेको गुनासो आएको छ,' पन्तले भने, 'भूमिगत समूहसँग साँठगाँठ गर्ने जोकोही कर्मचारीलाई कडा कारबाही गर्ने छौं ।' गुनासो गर्ने कर्मचारीको नाम गोप्य राख्दै पन्तले सशस्त्र समूहलाई कार्यालयकै कर्मचारीले मोबाइल नम्बर दिएर धम्क्याउन लगाउने गरेको गुनासो आएको बताए ।  तराईमा सशस्त्र समूहको गतिविधि बढेयता रौतहटमा तीन कर्मचारीको हत्या भइसकेको छ । 'आफ्नै कार्यालयको कर्मचारीले मोबाइल नम्बर सशस्त्र समूहलाई दिएर धम्क्याउन लगाउँछ,' एक कार्यालय प्रमुख भन्छन्, 'हाकिमसँग चित्त नबुझेका कर्मचारीको कामै नम्बर दिएर धम्की दिन लगाउने भएको छ ।'  प्रजिअ पन्तले केही सञ्चारकर्मीर् समेत भूमिगत संगठनमा लागेको कुरा आएको बताए । 'प्रशासनको पहिलो प्राथमिकता शान्ति र सुव्यवस्था भएकाले त्यसमा कसैसँग सम्झौता गर्दिन' प्रजिअ पन्तले भने ।  पत्रकार महासंघ रौतहट शाखा सचिव सञ्जय कार्कीले भूमिगत संगठनका व्यक्तिले घटनाको जिम्मेवारी लिन वा घटनाको पुष्टि गर्न सञ्चारकर्मीले टेलिफोन गरेकै भरमा कलडिटेल्स मगाएर संलग्नता छ भन्न नमिल्ने जिकिर गरे ।  प्रहरी उपरीक्षक घनश्याम अर्यालले टोलिफोन गरेकै भरमा आरोप नलाग्ने बताए । उनले अनुसन्धान गरेर मात्रै संलग्नता छ/छैन बताउने जनाए ।  

ekantipur