महिला हिंसा रोक्न सर्लाहीका महिलाहरु संगठित

जिल्लामा बढ्दै गईरहेको महिला हिंसा रोक्न सर्लाहीका महिला नेतृहरु संगठित भएका छन् । जिल्लास्थित विभिन्न राजनीतिक दलका नेतृहरुको आज सुखेपोखरीमा भएको संयुक्त भेलाले महिला अधिकार प्राप्ति तथा महिला हिंसाविरुद्ध अभियान सञ्चालन गर्ने उद्देश्यले दबाब समूह गठन गरेको हो । एकीकृत नेकपा माओवादी निकट अखिल महिला सङ्घ क्रान्तिकारीका जिल्ला अध्यक्ष माया बलको संयोजकत्वमा ९ सदस्यीय जिल्ला स्तरीय महिला दबाब समूह गठन भएको अखिल महिला सङ्घका जिल्ला सचिव पार्वती विश्वकर्माले जानकारी दिनुभयो । आज भएको महिला नेतृहरुको भेलाले जेठ २० गते हरिवन गाविस वडा नं.३, दनुवारीकी देउली कुमर दनुवारलाई बोक्सीको आरोपमा कुटपिट र दुर्व्यवहार भएको घटनाप्रति घोर भर्त्सना प्रकट गर्दै दोषीहरु विरुद्ध कडा कार्वाहीको माग पनि गरेको छ । ५५ वषिर्या देउलीलाई स्थानीय ६ जनाले कपाल मुण्डन गरी कालो मोसो दलेर मलमूत्र खुवाउँदै कुटपिट गरेका थिए । देउलीलाई दुर्व्यवहार गर्ने शीतल धामी, टैटा धामी, अनुपलाल धामी, बौवा धामी, प्रमेश चौधरी र लक्ष्मीकान्त कुमर अनुसन्धानको क्रममा अहिले प्रहरी हिरासतमै छन् । रासस