उपत्यका बन्यो अन्तर्राष्ट्रिय अपराधीको सुरक्षित स्थल

एक प्रहरीलाई साढे सात सयको जिम्मा 
उपत्यकाको अनुमानित जनसंख्या ४० लाख छ, तर प्रहरीको दरबन्दी यो अनुपातमा बढ्न सकेको छैन। महानगरीय प्रहरी आयुक्त कार्यालयले आफू मातहत ८ हजार ९ सय ८० दरबन्दी रहेको जनाएको छ। त्यसमध्ये ४ हजार ८ सय ४७ मात्र कार्यक्षेत्रमा खटिन्छन्। अन्य प्रहरी गण, विमानस्थल सुरक्षा र ट्राफिक कार्यालयमा कार्यरत छन्।
'अहिले उपत्यकाको सुरक्षाका लागि कम्तीमा २० हजार सुरक्षाकर्मीको आवश्यकता छ,' एआइजी रानाले भने, 'हामीले यसको एकतिहाइका भरमा सुरक्षा मिलाउनुपरेको छ।'
अन्तर्राष्ट्रिय मापदण्डअनुसार सहरी क्षेत्रको सुरक्षामा एक प्रहरीको भागमा करिब २ सयको सुरक्षा जिम्मेवारी हुनुपर्छ। उपत्यकामा भने एक प्रहरीले करिब ७ सय ३२ को सुरक्षा सम्हाल्नुपर्ने स्थिति छ। त्यो पनि रिङरोड क्षेत्रभित्र बढी केन्द्रित रहेको आयुक्त कार्यालयको तथ्यांकले देखाउँछ।
एआइजी रानाले जनशक्ति अभावमा एकै प्रहरीलाई विभिन्न स्थानमा खटाउनुपर्ने बाध्यता रहेको बताए। 'यसले उपत्यकाको ग्रामीण क्षेत्रमा सुरक्षा कायम गर्न धौधौ परेको छ,' उनले भने। उनका अनुसार रिङरोड क्षेत्रबाहिर १९ प्रहरी इकाईमार्फत् जम्मा २ सय २१ प्रहरी परिचालित छन्। 'ग्रामीण क्षेत्रमा सहरीकरण बढिरहे पनि हामी रिङरोडभित्रै बढी केन्द्रित छौं,' रानाले भने, 'काठमाडौं, भक्तपुर र ललितपुरका कोर-क्षेत्रमा विशेष सुरक्षा कार्ययोजना लागू गरिएको छ, तर ग्रामीण क्षेत्रमा सुरक्षा व्यवस्था मिलाउन धौधौ छ।'

source:-nagriknews