नेपाली नागरिकता लिन खोज्ने विदेशी पक्राउ

  नुवाकोट, १६ साउन    नेपाली राहदानीमा सयौँ गैरनेपाली बिदेसिएको समाचार आइरहेका वेला नुवाकोटमा एक विदेशी युवती नेपाली नागरिकता लिन खोज्दा पक्राउ परेकी छिन् । तिब्बती मूलकी भारतको बैङ्लोर बस्दै आएकी २२ वषर्ीया छुङ्ता गुरुङलाई जिल्ला प्रशासन कार्यालयले आइतबार पक्राउ गरेको हो ।   झुटो विवरण पेस गरी नेपाली नागरिकता लिन खोज्ने छुङ्तासहित अन्य तीनजना नेपालीलाई पनि पक्राउ गरी अनुसन्धान सुरु गरेको जिल्ला प्रशासन कार्यालयले जनाएको छ । जन्मदर्ता प्रमाणपत्र, गाविस सचिवको सिफारिस, नाता प्रमाणित प्रमाणपत्रका आधारमा नागरिकता प्रदान गर्ने अन्तिम चरणमा सहायक प्रमुख जिल्ला अधिकारी सन्तोष पौडेलले शंका लागि सोधपुछ गर्दा छुङता विदेशी भएको रहस्य खुलेको हो ।   छुङ्ताले सूर्यमति-८ स्थायी ठेगानाको बासिन्दा बनेर नागरिकता लिन खोजेकी थिइन् । छुङ्तालाई नेपाली नागरिकता दिलाउन नक्कली बाबु बन्ने सूर्यमति-ं८ का ६६ वषर्ीय भक्तबहादुर तामाङ, नागरिकता दिलाउन झुट्टो विवरणमा सनाखत बस्ने सोही गाविसकै कृष्णप्रसाद थपलिया र देवेन्द्र न्यौपानेलाई समेत पक्राउ गरेर कारबाही सुरु गरेको प्रमुख जिल्ला अधिकारी मधुसूदन बुर्लाकोटीले बताए । कीर्ते गर्नेलाई नागरिकता ऐनअनुसार कारबाही हुने उनको भनाइ छ ।   नागरिकता हात परेपछि आफूलाई २५ हजार रुपैयाँ दिने सहमति भएको नक्कली बाबु बनेका भक्तले बताए । 'तपाइर्ंका सन्तान पढाउन, घर खर्च गर्न सजिलो हुन्छ, बाबु बन्नुस् भने । त्यसैले बनेँ,' भक्तले भने, 'अहिले आएर फसियो ।'   भारतको बैंगलोरस्थित झाङ्गुप गुम्बाबाट दुई महिनाअघि काठमाडौं बौद्धस्थित सेतु गुम्बामा बस्न आएको छुङ्ताले बताइन् । नागरिकता बनाउन ६० हजार रुपैयाँ खर्च भएको बताउने छुङ्ताले कसलाई कति रकम दिएको हो भन्ने खुलाइनन् । कनिकुथी नेपाली बोल्ने उनले आफू भारतमा बस्दै आए पनि तिब्बती नभएको दाबी गरिन् । तर, उनले आफू कहाँको नागरिक हो भन्ने पनि खुलाइनन् । युरोप जानका लागि राहदानी आवश्यक परेकाले नेपाली नागरिकता र राहदानी बनाउन नेपाल आएको छुङ्ताको भनाइ छ ।  छुङ्तालाई नागरिकताको सिफारिस गर्ने दुई सचिव पनि अनुसन्धानको घेरामा तानिएका छन् । हाल रालुका गाविसको सचिव हरिप्रसाद उपे्रतीले तीन दिनअघि ०६६ असार १६ गतेको मितिमा छुङ्ता भक्तबहादुरको छोरीको रूपमा जन्मदर्ता प्रमाण पत्र र नाता प्रमाणित दिएका थिए । सोही प्रमाण पत्रको आधारमा नागरिकताका लागि सिफारिस गरेको सूर्यमति गाविसका सचिव नारायणप्रसाद कँडेलले बताए ।    

source:-नयाँ पत्रिका