दुई वर्षमा पनि राहत आएन

कुर्घा -पर्वत, जेष्ठ २९ -  दुई वर्षअघि कतारमा पानीजहाज दुर्घटनामा परी मृत्यु भएका परिवारले अहिलेसम्म राहत पाएका छैनन् ।  कुर्घा ३ का ऋषिप्रसाद शर्माको मृत्यु भएको दुई वर्ष बितिसक्दा पनि परिवारले राहत पाएनन् । 'राहत पाइन्छ भन्न्ो सुनेकी हुँ,' श्रीमती गीतादेवीले भनिन्, 'तर कहाँ गएर राहत लिने हो थाहा   छैन ।' कामका सिलसिलामा कतार पुगेका शर्माको ०६६ साल असारमा पानीजहाज दुर्घटनामा मृत्यु भएपछि परिवार समस्यामा परेका छन् । 'राहत पाइने आसमा बसेको दुई वर्ष बितिसक्यो,' शर्माले भनिन्, 'तर अझै कहीँ कतैबाट राहत पाउन सकिएन ।' उनले कतार सरकारले ४४ लाख क्षतिपूर्ति दिने खबर सुने पनि अहिलेसम्म पाउन नसकेको   गुनासो गरिन् ।  श्रीमान् विदेश जाँदा लगेको ऋणसमेत तिर्न नपाएको उनले बताइन् । चार महिनामात्र खान पुग्ने खेतबारी भएकाले आम्दानीको स्रोत नहुंँदा ऋण तिर्न नसकिएको पीडित परिवारले बताए । 'कतार जाँदा एक लाख ऋण थियो,' उनले भनिन्, 'ब्याज बढेर दुई लाख पुगिसक्यो, तर कसरी तिर्ने थाहा छैन ।' आर्थिक अभावले छोराछोरी पढाउन समस्या भएको गीताले बताइन् । शर्माका दुई छोरी र एक छोरा छन् । 

kantipur