सुकुम्बासीका ९१ घर-टहरामा जबर्जस्ती आगो लगाइयो

सागरनाथ वन विकास परियोजनाअन्तर्गत कर्मैया- ८ मा बनाइएका ९१ वटा सुकुम्बासीका घर-टहरा शुक्रबार भत्काइएको हो   

सर्लाही, २२  जेठ  सार्वजनिक जग्गा अतिक्रमण गरिएको भन्दै सुकुम्बासी परिवारका ९१ घर-टहरा भत्काइएका छन् । वनरक्षक, इलाका वन कार्यालय मूर्तियाका वनरक्षक र सशस्त्र  तथा जनपद प्रहरीको संयुक्त टोलीले घर-टहराभित्र राखिएको सुकुम्बासीका सरसामानसमेत निकाल्न नदिई बस्तीम्ाा आगो लगाएपछि सुकुम्बासीको बिचल्ली भएको छ ।  सागरनाथ वन विकास परियोजनाअन्तर्गत कर्मैया- ८ मा बनाइएका ९१ वटा सुकुम्बासीका घर-टहरा शुक्रबार भत्काइएको हो । परियोजना कार्यालयका वनरक्षक, इलाका वन कार्यालय मूर्तियाका वनरक्षक र सशस्त्र  तथा जनपद प्रहरीको संयुक्त टोलीले आगो लगाएर घर-टहरा नष्ट गरेको हो । प्रहरी उपरीक्षक पूर्णचन्द्र जोशीले वन क्षेत्रमा बनाइएका ९१ वटा घर-टहरा नष्ट गरिएको बताए । वन अधिकृत रामसागर यादवले परियोजना क्षेत्रका २७ सय हेक्टर जमिन कब्जा गर्ने उद्देश्यले जथाभावी घर-टहरा बनाइएकाले नष्ट गरिएको दाबी गरे ।   सुकुम्बासीले भने घरभित्रको सरसामानसमेत निकाल्न नदिई आगो लगाएर घर-टहरा नष्ट गरेको गुनासो गरे ।  घटनाको भूमिअधिकारवादी विभिन्न संघसंगठनले विरोध जनाएका छन् । भू-हक मूल संघर्ष समिति, अखिल नेपाल सुकुम्बासी संघ र भूमिअधिकार मञ्च सर्लाहीले सुकुम्बासीको खाने, बस्ने अधिकारको हनन भएको भन्दै आन्दोलनमा उत्रिने चेतावनी दिएका छन् ।

nayapatrika