जन्ती बस दुर्घटना, चारको मृत्यु

झापाको जुरोपानी-३ मा जन्तीको बस दुर्घटनामा हुदँ चार जनाको मृत्यु भएको छ ।
दुर्घटनामा परी ३ दर्जनभन्दा बढी घाइते भएका छन् । मृत्यु हुनेमा कोहवरा-५ का गोविन्द ताजपुरिया, कोहवरा-९ का विन्देश्वर शर्मा, राजु ताजपुरिया र प्रेम सिंह ताजपुरिया रहेका छन् । गोविन्दको उपचारका लागि ल्याउँदै गर्दा बाटोमै मृत्यु भएको थियो भने अन्य तीन जनाको बसले च्यापिएर घटनास्थलमै मृत्यु भएको प्रहरीले जनाएको छ । जुरोपानी-१ का कालीप्रसाद राजबंशीको घरबाट जन्ती लिइ फर्कदै गरेको बस सडकबाट १० मिटर तल नहरमा खसेको छ ।
कोहबारा-५ का अमरलाल राजबंशीको घरबाट जन्ती लिएर गएको मे १ ख ४६७ नम्बरको बस दुर्घटना हुँदा बसका सबै जन्तीहरु घाइते भएका थिए ।
इलाका प्रहरी कार्यालय गौरीगन्जका अनुसार साँघुरो सडक भएका कारण दुर्घटना भएको हो । प्रहरीका अनुसार बिवाह सकेर फर्कंदै गरेको बस बेलुकी साढे ८ बजे दुर्घटना भएको थियो । दुर्घटनामा परी घाइते हुनेहरुमा कोहबरा-५ का समीलाल राजवंशी, कुमार ताजपुरिया, निरज चौधरी, जानुका चौधरी, सञ्जय ताजपुरिया, कृष्ण पोखरेल, अर्जुन राजवंशी, सुनिल राजवंशी र वार्ड नं. ४ का विद्या राजवंशी रहेका छन् ।

त्यस्तै सरस्वती चौधरी, उषा चौधरी, उत्तनलाल राजवंशी, भीमप्रसाद राजवंशी, चन्द्रप्रसाद राजवंशी, कुशल ताजपुरिया, कृष्णप्रसाद रिजाल, सूर्यप्रसाद राजवंशी र किरण राजवंशी उपचारपछि घर फर्किएका छन् ।
प्रहरी निरीक्षक श्याम खत्रीले साँघुरो सडकको दुबैतिर नहर भएका कारण दुर्घटना भएको हुन सक्ने बताए । बस सडकबाट तल खसेपछि बस भित्र रहेका सबै घाइते छन्- उनले भने ।

घाइतेहरुको उद्धारका लागि सशस्त्र प्रहरी, जनपथ प्रहरी, ट्राफिक प्रहरी र स्थानीयबासीहरु लागेका छन् । बिहीबार बिहानसम्म स्थानीयबासी र प्रहरी सहितको र्याकरले बसलाई नहरबाहिर तान्न नसकेपछि उद्धार कार्यमा समस्या आएको छ ।
बिहानदेखि उद्धार जारी राख्ने प्रंहरीले जनाएको छ । प्रहरीले बस भित्र आधा दर्जनभन्दा बढी जन्तीहरु रहेको आशंका गरेको छ । उनीहरुको अवस्थाको बिषयमा केही भन्न नसकिने प्रहरी अधिकारीले जनाएका छन् । नहर हिलाम्मे भएका कारण उद्धारमा समस्या आएको जनाइएको छ । बस भित्र रहेका जन्तीहरुको बसले किचिएको र उनीहरुलाई बाहिर निकाल्न नसकिएको उद्धार कार्यमा संलग्न प्रहरी अधिकारीहरुले जनाएका छन् । प्रहरीका अनुसार बेहुला अनुप र बेहुली सम्झना भने सानो भ्यानमा गएका कारण सकुशल रहेका छन् ।
यता दुर्घटनामा परी घाइते भएका ८ जनालाई नोबेल मेडिकल कलेज बिराटनगर लगिएको छ । दुर्घटनामा परी घाइते भएका अन्यको दमकस्थित लाइफलाइन अस्पतालमा उपचार भइरहेको छ ।

purbelitimes

युवराज