धादिङ, माघ ८ - तीन बर्ष अगाडिदेखि श्रीमतीको दुवै मृगौला खराब भएपछि उपचारको लागि रकम संकलन गर्न रातोदिन मजदुरी गर्दै आएका श्रीमानको आफ्नै मृगालाकै समस्याबाट मृत्यु भएको छ । धादिङ जिल्ला कुम्पुर– २ परेवावाटार निवासी ३० बर्षिय यमबहादुर दर्लामी मगरको २ वटै मृगौलाले काम नगरेपछि गत पुष २७ गते उपचारको क्रममा मृत्यु भएको हो ।
श्रीमती चित्रकुमारी दर्लामी मगरको मृगौलाको उपचारका लागि रकम संकलन गर्न रातोदिन ड्राइभर काम गर्दै आएका यमबहादुर आफै मरेपछि अहिले परिवारको बिचल्ली भएको छ । विगत ३ वर्षदेखि चित्रकुमारीलाई मृगौला सम्बन्धी समस्या देखिएको भएपनि आर्थिक अभावकै कारण समयमै उपचार हुन सकेको थिएन । मजदुरी गरेर भएपनि केही रकम संकलन गरी श्रीमतीको उपचार गराउने चाहाना बोकेर श्रीमान यमबहादुरले दैनिक ओभरटाइम चालक काम पनि गरे । तर, उनी आफैंको मृगौलाको समस्याको कारण उपचारकै अवस्थामा ३० बर्षको उमेरमा मृत्यु भएपछि चित्रकुमारीसँगै छोराछोरीको पनि बिचल्ली भएको छ ।
चित्रकुमारी पनि अहिले हिडडुल गर्न नसक्ने अवस्थामा रहेकीले झन समस्या परेको स्थानीयबासीले बताएका छन् । चित्रकुमारीका १ छोरा र १ छोरी रहेका छन् ।
Kantipur Fm 
0 commentaires