काठमाडौ, पुस २९ - सेतो मत्स्येन्द्रनाथको महास्नान बौद्ध धर्मिक परम्पराअनुसार राजधानीको केलटोलस्थित कनक चैत्य महाविहार प्राचीन नाम रहेको जनबहालमा बुधबार सम्पन्न भयो ।
मत्स्येन्द्रनाथको मूर्तिलाई मन्दिरबाट बाहिर ल्याई मन्दिरकै अगाडि रहेको डवलीमा सप्त नागसहितको आसनमा विराजमान गराई छवटा तामाको घडामा रहेको पानीमध्ये दुई जनाले एकै साथ तीन पटक र एक जनाले एक पटक तातो पानीले महास्नान गराइएको थियो ।
स्नान गराइरहँदा पञ्चताल -पैंता) नामको परम्परागत बाजा बजाइरहेको थियो । महास्नान गराउनुअघि मत्स्येन्द्रनाथको मूलपुरोहितले दस दिशामा बौद्ध परम्परा अनुसार चर्या नृत्य गर्दै दस दिक्पालको पूजा गरेका थिए ।
महास्नान गराउन बौद्ध तान्त्रिक विधिअनुसार नवनाग साधनाका साथ कलशाचार्य पूजा गरी शोभा भगवतीसँगैको निर्मल तीर्थ
-भचाखुसी) र विष्णुमतीको दोभानबाट छवटा तामाको र तीनवटा चाँदीका घडामा पवित्र जल राखी मंगलबार ल्याइएका थिए ।
त्यसरी ल्याइएको घडाहरूमध्ये महास्नान गराई बाँकी रहेका जलले भरिएका तीनवटा घडालाई मत्स्येन्द्रनाथ, करुणमय र आर्यताराको साधना गरेर मत्स्येन्द्रनाथ मन्दिरभित्रै राखेका थिए ।
महास्नाथपछि मत्स्येन्द्रनाथको मूर्तिलाई तासको कपडाले बेरिएर बाजागाजासहित मन्दिर परिक्रमा गराएर मन्दिरभित्र आफ्नो आसनमा नराखी अलग्गै विराजमान गराइएको थियो । महास्नान अवलोकन गराउन देशमा जीवितदेवीको रूपमा रहेकी कुमारीलाई कुमारीघरबाट स्नानस्थलमा पुर्याइएको थियो ।
मत्येन्द्रनाथको मूर्तिलाई माघ ५ गते पूणिर्माका दिन बौद्ध परम्परा अनुसार प्राणप्रतिष्ठा गराई पुरुष र नारी दुवैलाई गरिने जात कर्म, नामकर्म, अन्नप्रासन, उपनयन, चूडाकर्म, इही -बेल विवाह), गुफा राख्ने आदि दसकर्म गराइसकेपछि मात्र आफ्नै आसनमा राखिनेछ ।
source:-kantipur
Kantipur Fm 
0 commentaires