एमाले अध्यक्ष खनालमाथि थप्पड हान्नेविरुद्ध मुद्दा दायर

सुनसरी/ एमाले अध्यक्ष झलनाथ खनाललाई झापड हान्ने रेग्मीकी ७६ वषर्ीया आमा तिलकुमारी रेग्मीले देशको स्थिति हेर्दा आफ्ना छोराले नेतालाई झापड हानेर ठीक गरेको बताएकी छिन् । शुक्रबार बिहान आफ्नै निवासमा कुरा गर्दै उनले छोराले नेतालाई सजग गराउनका लागि झापड हानेकोमा दुःख नलागेको बताइन् ।

नेतालाई सजग गराउन छोराले अध्यक्ष खनाललाई थप्पड हानेर राम्रो काम गरेको उनको दाबी छ । तर, प्रहरीले छोरालाई जेल हालेको दुःख लागेको बताइन् । 'बूढेसकालको सहारा एक मात्र छोरालाई कुटेअरे, प्रहरीले समातेर जेलमा राख्यो रे ! भन्दा मलाई ज्यादै दुःख लागेको छ,' उनले भनिन्, 'छोरालाई अब प्रहरीले छाड्दैनन् होला । अब हामी कसरी बाँच्ने ?' एक मात्रै छोरा भएको पनि प्रहरीले पक्राउ गरेपछि परिवारको बिचल्ली भएको उनले बताइन् । 'मेरा तीन भाइ छोरामध्ये यो माइलो हो । जेठो छोरा १६ वर्षकै उमेरमा बिरामी भएर मर्‍यो । उसलाई उपचार गर्ने पैसा नभएर हामीले बचाउन सकेनौँ । कान्छो छोराको पनि तीन वर्षअघि ४० वर्षको उमेरमा मृत्यु भयो,' उनले भनिन्, 'अब बूढेसकालको सहाराका रूपमा यही छोरा थियो । उसलाई पनि प्रहरीले समातेर थुन्यो ।' 

स्वस्थानीको ब्रत लिएकी देवीप्रसादकी श्रीमती शोभा रेग्मीले आफ्ना श्रीमान्ले खनाललाई झापड हानेकोमा आफूलाई कुनै चिन्ता नलागेको बताइन् । नेपाली जनताले दुःख पाएको देख्दा आफ्ना श्रीमान्ले झापड हानेर ठीक गरेको उनले बताइन् । उनका अनुसार, पहिलेदेखि नै आफू आफ्ना श्रीमान् एमालेप्रति समर्पित भई भोट पनि हाल्दै आएका थिए । तर, एमालेले केही नगरेपछि संविधानसभा निर्वाचनमा माओवादीलाई भोट दिएको उनले बताइन् । श्रीमान्ले खनाललाई झापड हानेको घटनालाई एमालेले राजनीतिक रंग दिएको उनको आरोप छ ।