२२ पौष, काठमाडौं । नेपालस्थित राष्ट्रसंघीय नियोग (अनमिन)ले राजनीतिक दलहरुको निजी स्वार्थको कारण नेपालको शान्तिप्रक्रिया असफल हुन सक्ने चेतावनी दिएको छ । नेपालमा जारी ‘नाटकीय’ राजनीतिको अवस्था नउल्टिएसम्म खतरा बढिरहने अनमिनको चेतावनी छ ।
न्युयोर्कस्थित राष्ट्रसंघीय सुरक्षा परिषदमा गएराती नेपालको शान्तिप्रक्रियासम्बन्धि अन्तिम प्रतिवेदन पेश गर्दै अनमिन प्रमुख करिन ल्यानग्रेनले शान्तिप्रक्रिया गहिरो गतिरोध उत्पन्न भएको भन्दै निष्कर्षमा पुग्नेमा आशंका गर्नुभयो ।
एकीकृत नेकपा माओवादीले भन्दै आएको जनविद्रोह र सम्भावित राष्ट्रपति शासनले जनतामा त्रास फैलिएकोले यस्ता गतिविधिले शान्तिप्रक्रिया र लोकतन्त्र खतरामा पर्ने ल्यानग्रेनको भनाई छ ।
हतियार तथा लडाकु अनुगमनलाई निरन्तरता दिने निकाय गठन हुन नसक्दा अनमिन फिर्ता भएपछि के गर्ने भन्ने अन्यौल कायमै रहेको उहाँले बताउनुभयो । अनमिन फिर्ता भएपछि हतियार तथा लडाकु अनुगमनका लागि कानुनी रिक्तता उत्पन्न हुने उहाँले चेतावनी दिनुभएको छ । समायोजन हुने लडाकुको संख्या र निकायजस्ता प्रमुख मुद्दामा सहमति हुन नसकेको तथा पुनःस्थापना प्याकेजबारे सहमति हुन नसक्दा शान्तिप्रक्रिया थप संकटमा परेको उहाँले सुरक्षा परिषदलाई जानकारी गराउनुभयो ।
संविधान, सरकार निर्माण तथा शान्तिप्रक्रियामा केही प्रगति भने भएको उहाँको ठहर छ । दलहरुले आपसी समझदारीमार्फत् गतिरोध अन्त्यको प्रयास गरेको भन्दै उहाँले खुशी व्यक्त गर्नुभयो । आपसी सम्वादमार्फत् शान्तिप्रक्रियालाई निष्कर्षमा पुर्याउनु पर्ने उहाँको भनाई थियो ।
शान्तिप्रक्रियाले पूर्णता नपाए पनि अनमिनले आफ्नो कार्यादेशअनुसार काम गरेको भन्दै अनमिन प्रमुख ल्यानग्रेनले सन्तुष्टि व्यक्त गर्नुभएको छ ।
source:-onlinekhabar
Kantipur Fm 
0 commentaires