२९ साउन, चितवन । बक्यौता महशुल नतिरेको भन्दै नेपाल विद्युत प्राधिकरणले बिजुलीको लाइन काटिएपछि चितवनको रामपुरस्थित कृषि तथा वन अध्ययन संस्थान अनिश्चितकालका लागि बन्द भएको छ । विद्युत अभावमा कृषि तथा भेटेनरीका कक्षा सञ्चालन गर्न नसकिने भएकाले बन्द गर्नुपरेको क्याम्पस प्रशासनले जनाएको छ । क्याम्पस प्रशासनले बन्द भएका बारेका आधिकारिक रुपमा जानकारी नगराए पनि प्राध्यापकहरुले विज्ञप्ति निकालेर विद्युतको वैकल्पिक व्यवस्था नभएसम्म क्याम्पसमा पठन-पाठन बन्द गरिएको जनाएका छन् । उनीहरुले क्याम्पस सुचारु गर्न तत्काल विजुलीको वैकल्पिक व्यवस्था गर्न माग पनि गरेका छन् । महशुल नबुझाउने कार्यालय तथा व्यक्तिहरुको विद्युत लाइन काट्ने सरकारी निर्णयअनुसार रामपुर कृषि क्याम्पसको विद्युत लाइन गत बिहीबार काटिएको थियो । क्याम्पसले झण्डै चार करोड रुपैयाँ विद्युत महशुल बुझाउन बाँकी रहेको प्राधिकरण जनाएको छ ।
source:-onlinekhabar
Kantipur Fm 
