साउदीको आगलागीमा १ नेपालीको मृत्यु

 साउदी अरबको राजधानी रियादमा कामदार बस्ने घरमा आगो लाग्दा १ नेपालीसहित सात जनाको मृत्यु भएको छ । तीनजना जलेर घाइते भएका छन् । रियादको बाथजिल्लास्थित अलसुवेनको सुपरमार्केटको आवासीय घरको चौथो तलामा शनिबार बिहान आगो लागेको हो । ‘अहिलेसम्म मृत्यु भएकामा एक नेपाली र ६ भारतीय नागरिक भएको यहाँका सञ्चारमाध्यमले जनाएका छन्,’ गैरआवासीय नेपाली संघ साउदीका अध्यक्ष धर्म केसीले कान्तिपुरलाई फोनमा भने, ‘तर उनीहरू सबैको नाम र ठेगाना खुल्न सकेको छैन ।’  अरबन्युजका अनुसार मृत्यु भएका नेपाली कामदार २४ वर्षीय राकेश शाह हुन् । रियादस्थित नेपाली कार्यवाहक राजदूत हरिश्चन्द्र घिमिरेले दूतावासलाई घटनाबारे जानकारी नआएको राति कान्तिपुरलाई बताए । मृत्यु भएका सबैलाई आगोले पोलेको जनाइएको छ । घाइतेहरूको उपचार सुमेसु जनरल अस्पतालमा भइरहेको छ । भारतीय दूतावासका अधिकारीहरूले घटनास्थल अवलोकन गर्नुका साथै उपचाररत कामदारलाई भेटेका छन् । ‘हामीले आफ्नो कामदारको मृत्यु भएको जानकारी आफ्नो सरकारलाई दिइसकेका छौं,’ भारतीय दूतावासका एक उच्च अधिकारीलाई उद्धृत गर्दै अरबन्युजले भनेको छ, ‘शव छिटोभन्दा छिटो पठाउने प्रक्रिया सुरु गरिसकेका छौं ।’आगलागी भएको घरमा झन्डै ८० कामदार बस्थे । कान्तिपुरबाट