नेपालको लज्जास्पद पराजय

                                      जोर्डन- ९ नेपाल- ० 

काठमाडौं, श्रावण ७ - एसियाली विश्वकप छनोटको दोस्रो चरण अन्तर्गत शनिबार राति जोर्डनमा भएको पहिलो लेगमा नेपालले लज्जास्पद पराजय व्यहोरेको छ । अम्मान रंगशालामा राति अबेर सकिएको खेलमा नेपाल जोर्डनसँग ९ गोलले पराजित भएको हो ।   जोर्डनको जीतमा खेलको सातौं मिनेटमै मोहमद हसनले हेडबाट उत्कृष्ट गोल गरी खाता खोलेका थिए । उनले खेल अवधिभर ४ गोल गरे । हसनले सातौं, ७४ औं, ८४ औं र ९३ औं मिनेटमा गोल गरे ।  जोर्डनकै खालिल अमेरले २० औं र ५६ औं मिनेटमा गोल गरे भने अहमद हायलले ३१ औं र ६४ औं तथा सलिम अब्दुल्लाहले गोल ४६ औं मिनेटमा गोल गरे ।   फराकिलो पराजयसँगै करिव करिव नेपालको अघिल्लो चरणको यात्रा समाप्त हुने देखिएको छ । बिहीबार काठमाडौंस्थित दशरथ रंगशालामा हुने खेलमा नेपालले कम्तिमा १०-० ले पराजित गर्नुपर्नेछ । त्यो नेपालका लागि अत्यन्तै कठीन छ ।  खेलमा नेपाल बराबरीको नजिता ल्याउने योजनामा थियो । योजनाकार बेलायती नेपाली प्रशिक्षक ग्राहम्स् रोबर्टसले गरेको प्रयास पनि साकार हुन सकेन । नेपालले पाँच डिफेन्डरसहित रक्षात्मक टिम बनाएको थियो ।   नेपाली टिममा गोलकिपर किरण चेम्जोङ, सागर थापा, रोहित चन्द, सन्दीप राई, विकाससिंह क्षेत्री, विराज महर्जन, निराजन खड्का, भोला सिलवाल, शिव श्रेष्ठ, अनिल गुरुङ र जुमनु राई थिए ।  यसअघि एसियाली विश्वकप छनोटका लागि दशरथ रंगशालामा भएको दुवै खेल नेपालले जीतेको थियो ।    अपडेट   नतिजाः जोर्डन- ९ नेपाल- ०  - नेपालविरुद्ध जोर्डनको नवौं गोल । थपिएको तेस्रो मिनेटमा गोल भएको हो ।   - ८४ औं मिनेटमा फेरि गोल थप्यो । जोर्डनले नेपालविरुद्ध आठौं गोल गरेको छ । मो. हसनले गोल गरेपछि उनको हृयाटि्रक भएको छ ।  - जोर्डनले नेपाललाई गोल गर्न अवसर नदिई ७१ औं मिनेटमा मो. हसनले सातौं गोल गरेको छ ।  - ६४ औं मिनेटमा जोर्डनका इब्राहिम अहमदले छैटौं गोल गरे ।  - ५६ औं मिनेटमा जोर्डनका खालिल अमेरले फेरि अर्को गोल थपे ।   मध्यान्तरपछिको खेल जारी   - मध्यान्तरपछि केही हतास देखिएको नेपाली खेलाडी टोली मैदानमा प्रवेश गरेको छ ।   मध्यान्तर । जोर्डन- ४ नेपाल- ०  - गर्बिलो प्रदर्शन गरेपछि जोर्डन समर्थकहरु घरेलु मैदानमा नाचगान गरिरहेका छन् ।   - मध्यान्तरका लागि थपिएको एक मिनेटमा पनि जोर्डनका सलिम अब्दुल्लाहले गोल थपे ।  - मध्यान्तर नजिकै पुग्दा नेपालले प्रदर्शन सुधारेको छ ।  - ३१ औं मिनेटमा जोर्डनले अर्को गोल थप्यो । अहमद हायलले गोल गरेका हुन् ।   - २० औं मिनेटमा फेरि जोर्डनले गोल गरेको । खालिल अमेरले गोल लगाए ।  - सातौं मिनेटमा जोर्डनले नेपालविरुद्ध गोल गरेको छ । मो. हसनले गोल लगाए ।  - खेल सुरु भएको छ ।

source:-ekantipur