वासिङ्टनमा भेला हुँदै नेपाली नर्सहरु

अमेरिकामा रहेर नर्सिङ पेशा गरिरहेका नेपालीहरुको भेला पहिलोपटक वासिङ्टन डीसीमा हुने भएको छ । एसोसिएसन अफ नेप्लिज इन अमेरिका (एएनए)को २९ औं सम्मेलनको अबसर पारेर आगामी जुन २ तारिखमा नेपाली नर्सहरुको भेला बोलाइएको कार्यक्रमकी भेला आयोजक मध्येकी एक मञ्जु संग्रौलाले जानकारी दिनुभयो । अमेरिकामा नेपाली नर्सहरुको संख्या बढ्दै गएपनि आपसी सम्बन्ध र नेटवर्क नहुँदा सहयोग आदान प्रदान हुन नसकेको ठहर गर्दै भेला आयोजना गर्न लागिएको संग्रौलाले जानकारी दिनुभयो । अमेरिकामा रहेर नर्सिङ पेशा गर्ने वा नेपालमा अध्ययन सकि अमेरिका आएर नर्सिङ पेशा अपनाउने सोंच बनाइरहेका नेपालीहरु नर्सहरुलाई भेलामा सहभागी हुन उहाँले आह्वान गर्नुभएको छ । नेपालबाट आएका धेरै नयाँ नर्सहरुलाई यहाँ लाइसेन्स लिएर कसरी रजिष्टर्ड नर्स बन्ने भन्ने जानकारी छैन- संग्रौलाले भन्नुभयो-’सूचनाको अभावले कतिपयले नर्सिङ छाडेर अरु नै पेशा गरिरहेको पनि पाइयो ।’ यही अप्ठ्यारोलाई हटाउन तथा नव आगन्तुकलाई सहयोग र सूचना प्रदान गर्न पनि नेपाली नर्सहरुको नेटवर्क आबश्यक रहेको महसुस गरि पहिलोपटक भेला आयोजना गरिएको उहाँले जानकारी दिनुभयो । यसअघि अमेरिकामा रहेका नेपाली चिकित्सक तथा इन्जिनियरहरुको संगठन बनाइ नियमित कार्यक्रमहरु हुने गरेपनि नर्सहरु संगठित भएका छैनन् । बिश्वका अन्य मुलुकमा नर्सिङ पढेपनि अमेरिकामा नर्सिङ पेशा अपनाउन त्यहाँको CGFNS नामक बोर्डबाट परिक्षा उतिर्ण गरि लाइसेन्स लिनुपर्छ । यस्तो लाइसेन्सको प्राबधान राज्यपिच्छे फरक हुने र क्रेडिट सिस्टमका आधारमा सीप नपुग भए थप तालिम समेत लिनुपर्ने भएकाले लाइसेन्स लिन नयाँ नर्सहरुलाई झण्झटिलो लाग्ने गरेको उहाँको अनुभव छ । अमेरिकामा रिजष्टर्ड नर्सलाई आर्कषक पेशा मानिन्छ । 

purbelitimes