ताप्लेजुङ, फाल्गुन १८ - नेपाल बार एसोसिएसनका अध्यक्ष प्रेमवहादुर खड्काले सभासद्हरुले संविधान लेख्न नसके कानुन व्यवसायीले तयार पारिदिने बताएका छन् ।
'हामीलाई भत्ता चाहिएन । भत्ता तपाईहरु (सभासदहरु) ले नै लानुहोस्', जिल्ला बार भवन सिलान्यासका क्रममा बुधवार खड्काले भने, 'संविधान बनाउन नसक्ने हो भने कानुनव्यवसायीले मस्यौदा गरिदिन्छौं ।'
खड्काले संविधानसभाको म्याद थपका लागि बाटो खुल्ने गरी सर्वोच्चले गरेको फैसलाप्रति आपत्ति समेत जनाए । सर्वोच्चका न्यायाधीश बलराम केसीसहितको इजलासले संविधान जारी नभएसम्म संविधानसभाको कार्यकाल रहने औंल्याउदै म्याद थपका लागि आधार खडा गर्ने फैसला हालै गरेको हो । 'सर्वोच्चको फैसला आपत्तिजनक र त्रुटिपूर्ण छ । त्यसमा बारको असहमति छ', उनले भने ।
संविधान निर्माणमा भइरहेको ढिलाई र सर्वोच्चको फैसलाको विरोधमा खड्काले अधिकांस समय खर्चिएका थिए । सिलान्यास कार्यक्रममा सहभागी सभासद सुर्यमान गुरुङलाई प्रतिनिधि पात्र बनाउदै उनले कानुनव्यवसायी संविधानको मस्यौदा समयमै बुझाउन तयार रहेको बताएका थिए । गुरुङ्गप्रति लक्षित गर्दै भने, 'यो सन्देश सवै सभासद्लाई पुर्र्याइदिनुहोस् । अब पनि संविधानसभाको म्याद थप्न खोजे जनताले छोड्नेवाला छैनन् ।'
राजाको शासनमा राजनीतिक दलका नेताहरु वन्दी हुँदा कानुन व्यवसायीले आन्दोलन गरेको स्मरण गर्दै खड्काले भने, 'हिजो तपाईहरुलाई न्याय दिनु पर्छ भनेर हामी कुर्लियौं । आज तपाईहरुवाट जनताले न्याय नपाउने अवस्था नआओस् ।'
source:-ekantipur









0 commentaires