इलाम, माघ २८ - लामो समयदेखि झापाको घोडामाराका तोरिया राजवंशी आफ्नी १३ वषर्ीया छोरीको खोजीमा छन् । काममा विदेश लगिदिन्छु भन्ने र अरू संस्थामा धाएर उनले सोधखोज गरिरहे पनि छोरी कहाँ भन्ने पत्तो पाएका छैनन् ।
झापाकै पाराखोपीका प्रेम राईले कुवेत पठाउने भनेर लगेपछि अहिलेसम्म तोरियाले छोरीको कुनै खबर पाएनन् । उनी यस्तै गुनासो लिएर सुरक्षित वैदेशिक रोजगार सूचना तथा परामर्श केन्द्र धाइरहन्छन् ।
यस्तो पिरलो पर्ने उनी एक्ला भने होइनन् । घोडामारा ४ का भर्ती किस्टुले पनि आफ्नी छोरीलाई शोभा राजवंशीले कुवेत लैजाने भनेर ११ महिनाअघि लगेपछि केही खबर नपाएको बताए ।
झापाका विभिन्न ठाउँका युवतीलाई यसैगरी विदेश लगिदिने भनेर कता पुर्याएको भन्दै धेरै अभिभावक गुनासो लिएर आउने गरेको केन्द्रकी परामर्शदाता अनुपा राउत बताउँछिन् । विदेश जानेलाई त्यो देशको भाषा, संस्कृतिजस्ता विषयमा जानकारी गराइरहेको केन्द्रमा अचेल यस्ता गुनासा प्रशस्त आउने गरेको राउत बताउँछिन् । जलथल, दुर्गापुर, पृथ्वीनगर तथा आसपास क्षेत्रका ६० जनालाई हाल परामर्श दिइरहेको केन्द्रले परिवारका सदस्य बेपत्ता भएको गुनसो पनि सुन्नु परिरहेको छ ।
'नागरिकता बनाउने उमेरै नपुगेकालाई पनि विदेश पठाएको भन्ने गुनासो आएको छ,' राउत भन्छिन्, 'अर्कैको राहदानीमा तस्बिर फेरेर लैजाने गरिन्छ ।' दर्ताबिना सञ्चालनमा रहेका म्यानपावर कम्पनीले यस्तो गरेका घटना धेरै
छन् । यसबाहेक व्यक्तिगत रूपमा पठाउनेले पनि एउटा देश भनेर अन्तै पुर्याउने गरेको छ ।
समुद्रपार लगिदिने भनेर भारतका विभिन्न ठाउँ पुर्याउने गरिएको फर्काउने अभियानमा संलग्न अभियानकर्मी बताउँछन् । त्यसरी लैजाने क्रममा कतिपयको उद्धार हुने गरेको छ । बढी संख्याका भने, 'दलाल' ले पुर्याउने ठाउँमा पुर्याएर शोषित हुने गरेका छन् ।
यसरी लैजाँदा इलामको पशुपतिनगर, झापाको काँकडभिट्टा, मोरङको जोगबनी नाकालगायत सीमाद्वार प्रयोग गर्ने चलन छ । चेलिबेटी बेचबिखनविरुद्ध क्रियाशील माइती नेपालका अनुसार सन् २०१० मा २ सय ७६ युवतीलाई पशुपतिनगर नाकाबाट फर्काएको छ । तीमध्ये घरेलु हिंसापीडित र वैदेशिक रोजगारीमा लगिदिने भनेर फसाइएका छन् ।
तिनमा ११ वर्षदेखि ३१ वर्षसम्मका काठमाडौं, दोलखा, सिन्धुपाल्चोक, तेह्रथुमलगायतका रहेको माइती नेपाल, पशुपतिनगर संयोजक होम ढकालले बताए । विभिन्न माध्यमले चेतनामूलक कार्यक्रम गरी प्रचार गर्दा पनि यस्तो क्रम निरन्तर रहेको उनको भनाइ छ । शंकास्पद अवस्थामा भेटिएका युवतीलाई जाँचबुझपछि परिवारको सम्पर्कमा पठाउने गरेको उनले बताए ।
यसैगरी काठमाडौंस्थित इस्टर बेन्जामिन्स मेमोरियल फाउन्डेसन अभियानकर्मीले यसै साता ३० नेपाली बालबालिकालाई उद्धार गरेको छ । भारतको केरलास्थित राजकमल सर्कसमा रहेका उनीहरू ४ मोरङका, २ उदयपुरका अनि २४ जना नेपाली मूलका सिलिगुडीका बालबालिका रहेको फाउन्डेसनकी नेपाल कन्ट्री डाइरेक्टर शैलजा सीएमले बताइन् ।
उनका अनुसार प्रलोभन देखाएर बालबालिका भारतका विभिन्न ठाउँ पुर्याएर श्रम शोषण गर्ने समूह पूर्वमा सक्रिय छन् । धेरै पैसा कमाउने लोभमा पारी विद्यालय पढ्दै गरेका बालबालिकालाई भारत पुर्याएर सर्कसमा जोखिमपूर्ण काम गराउने, यौन शोषण गराउनेजस्ता घटना पाइएका छन् । 'आफन्तले नै सम्झौतापत्रमा सहीछाप गरी केटाकेटी बिक्री गरेका छन्,' सीएम भन्छिन्, 'महिनाको हजार रुपैयाँ पाउने भनी एक-दुई वर्षको पारिश्रमिक पेस्कीमा लिने गरेको कागज हामीसँग छ ।
source:-kantipur'
Kantipur Fm 
0 commentaires