मुम्बई, फाल्गुन ११ - भारतीय फिल्म नगरीका रहेकाहरूले बनाउन लागेको नेपाली फिल्म 'परिचय' को सुटिङ नेपालमा हुने भएको छ । त्यसका लागि अभिनेत्री मोनिका बेदी बुधबार काठमाडौं पुग्दै छिन् ।
हिन्दी फिल्महरूमा खेल्दाखेल्दै भारतीय डन अबु सलेमसँग विवाह गरेकी मोनिकालाई केही वर्षअघि भारत सरकारले सलेमसँगै विदेशबाट सुपुर्दगी गराएको थियो । उनी त्यसयता फेरि फिल्ममा देखिन थालेकी हुन् । 'परिचय' उनको पहिलो नेपाली फिल्म हुनेछ, सेलिब्रेटिज स्टारडस्टको ब्यानरमा मुम्बईबाटै निर्माण हुन लागेको हो ।
निर्देशक आकाश पाण्डेका अनुसार मोनिका करिब तीन साता नेपालमा रहनेछिन् । काठमाडौंमा एकदुई दिन बसेपछि सुटिङ युनिट पोखरा जानेछ । 'पोखरामा २५ दिनजति सुटिङ गरेपछि बैंकक जानेछौं,' पाण्डेले भने, 'बैंककमा पनि सुटिङ छ ।'
पहिलोपटक नेपाली फिल्ममा काम गर्न पाउँदा निकै खुसी लागेको मोनिकाले बताइन् । 'नेपालको नाम मात्रै सुनेकी थिएँ,' उत्साहित हुँदै उनले कान्तिपुरसँग भनिन्, 'जाने मौका पनि मिल्यो ।' उनले 'परिचय' को कथावस्तु मन परेको र नेपाल घुम्ने आफ्नो इच्छा पूरा हुने भएकाले पनि नेपाली फिल्ममा अभिनय गर्न राजी भएको बताइन् ।
'परिचय' मा निखिल उप्रेती पनि मुख्य भूमिकामा रहनेछन् ।
source:-ekantipur










0 commentaires