शाहीमान राई भोजपुर, माघ २३ यहाँ एक महिलाले तिम्ल्याहा शिशु जन्माएकी छन् । शुक्रबार बेलुकी भोजपुर जिल्ला अस्पतालमा टक्सार ९ की २० वषर्ीया सिर्जना तामाङले तिम्ल्याहा जन्माएकी हुन् ।
तीन छोरालाई जन्म दिएकी सिर्जनाको स्वास्थ्य स्थिति सामान्य रहेको अस्पतालकी अनमी रेनु राईले बताइन् । उनले भनिन्, 'शिशुहरूको वजन सामान्यभन्दा कम छ ।' पहिलो १ किलो ६ सय ग्राम, दोस्रो १ किलो ३ सय ग्राम र तेस्रो शिशुको तौल १ किलो २ सय ग्राममात्र छ ।
गर्भधारणको सात महिनामै जन्मिएका तिम्ल्याहालाई जिल्ला अस्पतालमा अक्सिजन दिएर राखिएको छ । तिम्ल्याहालाई बढी हेरचाह गर्नुपर्ने भएकाले सुविधायुक्त अस्पतालमा लैजान चिकित्सकले तामाङ दम्पतीलाई सुझाव दिएका छन् । 'तर कसरी लाने ? खर्च छैन' सिर्जनाका श्रीमान् गोविन्दले भने । शिशु जन्मदा सामान्य तौल २ केजी ५ सय ग्राम हुनुपर्नेमा तिम्ल्याहाको ५० प्रतिशत कम भएकाले अन्यत्र लैजान सिफारिस गरेको अस्पतालले जनायो ।
जन्मिएको २० घन्टा हुन लाग्दा पनि तिम्ल्याहालाई आमाको दूध खुवाइएको छैन । तिम्ल्याहा जन्मिएको भोजपुरमा सम्भवतः यो पहिलो भएको जिल्ला अस्पतालका डा. नरेन्द्र झाले बताए । विवाहको तीन वर्षपछि तिम्ल्याहा जन्मिनु एकातिर हर्ष भए पनि खर्चले आत्तिएको गोविन्दले बताए । तिम्ल्याहाले आँखा खोलेका छैनन् ।
source:-kantipur
Kantipur Fm 
0 commentaires