रमेशचन्द्र अधिकारी धनकुटा, फाल्गुन ९ - धनकुटाको हिले बजारमा भएको आगलागी पीडितको सहयोगार्थ विभिन्न संघसंस्थाको पहलमा राहत संकलन अभियान सञ्चालन गरिएको छ ।
नेपाल रेडक्रस सोसाइटी, नेपाल पत्रकार महासंघ, उद्योग वाणिज्य संघ, यातायात व्यवशायी, लगायत विभिन्न सरकारी तथा गैर सरकारी संस्थाहरुले राहत संकलन अभियान बिहानैदेखि सञ्चालन गरेका छन् । हालसम्म करिब एक लाख बढी रकम संकलन भइसकेको रेडक्रस जिल्ला सभापति दोर्णप्रसाद गुरागाईले जानकारी दिनुभयो । धनकुटा सदरमुकाम तथा हिलेमा विभिन्न समुह बनाइ राहत संकलन कार्य भइरहेको छ ।
यसैगरी धनकुटा नगरपालिकाको प्रकोप व्यवस्थापन कोषबाट पीडित परिवारलाई दश हजारका दरले राहत रकम उपलब्ध गराईएको कार्यकारी अधिकृत महेन्द्रकुमार खाम्याहाङ्ले जानकारी दिनुभयो । नगरपालिकाले विज्ञप्ति जारी गर्दै अग्नी पीडितको सहयोगका लागि राष्ट्रिय वाणिज्य बैंक धनकुटा शाखामा नगरपालिका अर्न्तर्गत प्रकोप व्यवस्थापन कोषको नाममा रहेको ग-५-४/१५२ नंबरको खातामा रकम जम्मा गर्न आग्रह गरेको छ ।
हिलेमा गत शनिवार भीषण आगलागी हुँदा ६ घर नष्ट भएको छ भने १४ परिवार विस्थापित भएका छन् । घटनामा करिब साढे चार करोड बराबरको सम्पत्ति नष्ट भएको छ ।
source:-ekantipur









0 commentaires