'तपाईंसँग मायावी शक्ति हुनुपर्छ '
ज्ञान प्राप्त गरेपछि भगवान् बुद्ध कुनै गाउँको बाटो हुँदै कतै गइरहेका थिए । उनको भव्य रूप र व्यक्तित्वको सुगन्ध परैबाट चाल पाएर एक किसान उनको छेउमा आए । आश्चर्यपूर्वक बुद्धलाई हेर्दै ती किसानले सोधे, 'मित्र, तपाईं को हुनुहुन्छ ? तपाईंको छेउमा रहँदा मलाई कुनै देवता वा ईश्वरको सम्मुख उपस्थित भएझैँ अनुभूत भइरहेको छ ।'
'म ती दुवै होइन,' बुद्धले जवाफ दिए ।
किसान बुद्धको जवाफले सन्तुष्ट भएका थिएनन् । 'त्यसो भए पक्कै पनि तपाईंसँग मायावी शक्ति हुनुपर्छ ।'
'होइन, मसँग कुनै मायावी शक्ति छैन ।'
किसानले फेरि सोधे, 'उसोभए तपाईंसँग त्यस्तो के छ जो मजस्तो सामान्य किसानका आँखामा पनि दृष्टिगोचरभइरहेको छ ?'
बुद्धले सौम्यभावमा बताए, 'म केवल जीवनको सुशुप्त अवस्थाबाट ब्युँझएिको छु । यही सत्य म सबैलाई बताइरहेको छु, तर कोही विश्वास गर्न तयार छैन !'
***
भगवान् बुद्धलाई एकदिन तिर्खा लाग्यो । उनले शिष्य आनन्दलाई नजिकैको झरनामा पानी लिन पठाए । त्यो झरनामा केहीबेर अघि केही जनावरले नुहाएका थिए । त्यसकारण झरनाको पानी फोहोर भएको थियो । आनन्द पानी नलिईकनै फर्केर आए । झरनाको पानी फोहोर हुनुको कारण बेलिबिस्तार लगाउँदै उनले बुद्धलाई भने, 'गुरु, अर्कै कुनै नदीबाट पानी ल्याऊँ कि ?'
तर बुद्धले भने, 'होइन आनन्द, त्यही झरनाबाट पानी ल्याऊ ।' पानी त अझै फोहोरै थियो । आनन्द तीनचोटिसम्म झरनामा जाँदै, फेरि फर्किन्थे । अनि फेरि गुरुको उही आदेश पाएर त्यही झरनामा पानी लिन जान्थे । चौथोचोटि झरनामा पुगेपछि आनन्द प्रफुल्लित भए, किनभने यसपटक झरनाको पानी सफा भइसकेको थियो । अन्ततः उनले सफा पानी लिएर आए ।
पानी पिएपछि भगवान् बुद्धले आनन्दलाई प्रेरक ज्ञान प्रदान गरे, 'आनन्द, हाम्रो जीवनको झरनालाई पनि अनेक कुविचारका पशुले फोहोर पारिरहन्छन् । हामी त्यो फोहोरबाट डराएर भागिरहन्छौँ । जुन दिन हामी भाग्दैनौँ, मन शान्त नहुँदासम्म प्रतीक्षा गर्छां, तब सबै कुविचार सफा हुन्छन् । झरनाको पानीजस्तै त हो मान्छेको मन ।'
आनन्द भगवान् बुद्धको कुरा सुनेर प्रसन्न भए ।
source:-nayapatrika
Kantipur Fm 
0 commentaires