युएईले अबुधाबी विकाष कोषबाट ती दुई सडक निर्माणमा सहयोग गर्ने बचनवद्वता व्यक्त गरेपनि सरकारले प्रस्ताव तयारि गरेको छ। कोषले अन्तिम निर्णयका लागि प्रस्ताव सहित आउन आग्रह गरेपछि सरकारले उक्त रकम सहयोग स्वरुप उपलब्ध गराउन अनुरोध सहितको प्रस्ताव प्रक्रिया अगाडि बढाएको हो।
'सीतापाइला-धार्के र सूर्यविनायक-धुलिखेल सडक बनाउन प्रस्ताव अघि बढाइएको छ,' परराष्ट्र मन्त्रालय स्रोतले नागरिकलाई भन्यो, 'दुईवटा सडकका लागि झण्डै साढे चार अर्ब रुपैयाँ सहयोग गर्न प्रस्तावमा आग्रह गरिएको छ।'
त्रिभुवन राजपथको नौवीसे-कलंकी खण्डको बैकल्पिक मार्गको रुपमा सीतापाईला-धार्के सडक निर्माण गर्न लागिएको हो। सडक विभागले सर्वेक्षण र डिजाइनको काम सकिसकेको उक्त सडकका लागि कोषबाट ३ अव ६५ करोड माग गरिएको छ।
सडक निर्माणका लागि ३ वर्षको अवधि लाग्ने प्रस्तावमा छ। दुई लेन प्रस्ताव गरिएको यस सडक खण्डमा प्रतिघण्टा ६० किलोमिटरका गतीमा सवारी साधन गुड्ने सक्नगरि निर्माण गरिनेछ।
प्रस्तावमा सूर्यविनायकदेखि बनेपासम्मको १६ किलोमिटर चौडा गर्न गर्न ३ र बनेपादेखि धुलिखेलसम्मको ५ किलोमिटर विस्तार गर्न एक वर्षको समयसिमा तोकिएको छ।
सूर्यविनायक-धुलिखेल सडक खण्ड विस्तारको झण्डै ३५ अर्ब माग गरिएको छ। यो सडक ४ लेन बनेपछि प्रतिघन्टा ८० किलोमिटरको गतिमा सवारी साधन गुड्न सक्ने प्रस्तावमा छ।
यसै वर्ष सुरुमा युएईका लागि नेपाली राजदूत अर्जुनवहादुर थापाले कोषका अध्यक्षलाई भेटी नेपाललाई सहयोग उपलब्ध गराउन आग्रह गरेका थिए। युएईका राष्ट्रपतिका भाइ अमिर शेख मन्सुर बिन जायद अल नाह्यान कोषका अध्यक्ष रहेका छन्। कोषका अध्यक्षले प्रस्ताव सहित आए सहयोग सकिने बताए पछि युएई स्थित नेपाली दूतावासले असार १७ गते परराष्ट्र मन्त्रालयलाई पत्र पठाएको थियो।
पूर्वाधार विकासमा सहयोग गर्न कोष तत्पर भएपछि परराष्ट्रले अर्थ मन्त्रालयलाई यसबार पत्रचार गरेको थियो। अर्थले भौतिक योजना तथा निर्माण मन्त्रालयलाई कोषले भनेअनुसार प्रस्ताव बनाउन आग्रह गरेपछि भौतिकले यहिता दुई सडक खण्ड निर्माण प्रस्ताव परराष्ट्र पठाएको छ।
'सडक निर्माणको बिस्तृत विवरण सहितको पत्र परराष्ट्र आईपुगेको छ,' परराष्ट्र स्रोतले भन्यो, 'प्रस्ताव छिट्टै युएई स्थित हाम्रो दूतावास मार्फत कोषमा पठाइन्छ।'
युएई सरकारले सन् १९७१ मा विकासोन्मुख देशको विकासमा सहयोग पुर्याउने उद्देश्यले कोषको स्थापना गरेको थियो। आफ्ना मित्र राष्ट्र तथा विकासोन्मुख देशलाई युएईले यही कोष मार्फत ऋण तथा अनुदान उपलब्ध गराउँदै आएको छ। पूर्वाधार विकास, जलविद्युत, कृषि, यातायात, उद्योग, स्वास्थ्य सेवा, पर्यटन, दूरसञ्चार लगायतका क्षेत्रमा विश्वका ५३ देशमा कोषले एक सय ९९ वटा परियोजना सञ्चालन गरेको छ।
source:- nagriknews
Kantipur Fm 
0 commentaires