विराटनगर, मंसिर ३ - योगगुरु स्वामी रामदेव र आयुर्वेदविद् आचार्य बालकृष्ण यही मङ्सिर २३ गते बिहीबार विराटनगर आउने कार्यक्रम रहेको छ ।
विराटनगरमा हुन गइरहेको विराट प्राण योग विज्ञान शिविर उद्घाटन र त्यसपछि हुने पतञ्जली योग समिति नेपालको राष्ट्रिय कार्यकारी बैठकलाई सम्बोधन गर्न स्वामी रामदेव र आचार्य बालकृष्ण आउनुहुने पतञ्जली योग समिति मोरङका महासचिव कैलाश रेग्मीले राससलाई बताउनुभएको छ ।
त्यसका लागि विराटनगरमा आवश्यक जानकारी दिन र योग शिविर तयारीका लागि विराटनगरमा मोरङका योग शिक्षकहरुको भेला सम्पन्न भएको छ । भेलामा पतञ्जली योग समिति नेपालका राष्ट्रिय प्रभारी लवदेव मिश्रले नेपालमा २५ हजार योग शिक्षक तयार भइसकेको जानकारी दिनुभयो ।
योग शिक्षक भेलामा नेपालका ६९ शाखाका जिल्ला प्रभारी तथा महिला प्रभारीलाई विराटनगरमा स्वामी रामदेवले सम्बोधन गर्ने कार्यक्रम तय भएको मिश्रले जानकारी दिनुभयो । भेलामा महिला राष्ट्रिय प्रभारी हेमा ढुङ्गानाले विराटनगरमा योगपिठ बनाउने लक्ष्य सहित काम अघि बढाइएको जानकारी दिनु भएको छ । रासस










0 commentaires