म्याग्दीमा चितुवा आतंक

११ साउन, म्याग्दी । म्याग्दी सदरमुकाम बेनीबजारमा बुधबार बिहानै जङ्गली चितुवा देखिएपछि बजारक्षेत्र बिहानभर आतंकित बन्यो ।  बजार छेउको बराहपाखो सामुदायिक वनबाट निस्किएको चितुवा बजारको संगमचोकस्थित एक पाउरोटी उद्योगभित्र पसेको थियो । पाउरोटी उद्योगमा कुखुरा खान पसेको अनुमान गरिएको चितुवा बाहिर निकाल्न बिहान साढे ६ बजेदेखि प्रहरीले निकै कसरत गरेपनि उक्त प्रयास सफल हुन सकेन । अन्ततः चितुवा बिहान आठ बजे पाउरोटी उद्योगको पर्खाल नाघेर भाग्ने क्रममा एक प्रहरीसहित दसजना घाइते भएका छन् ।  चितुवालाई नियन्त्रणमा लिने क्रममा प्रहरी सहायक निरीक्षक रामबहादुर क्षेत्रीसहित १० जना घाइते भएका हुन् । क्षेत्रीको पाखुरा र पिठ्यूँमा चोट लागेको छ । उनलाई उपचारका लागि जिल्ला अस्पताल लगिएको प्रहरीले जनाएको छ ।  चितुवालाई नियन्त्रणमा लिन प्रहरीले एक राउण्ड गोलीसमेत प्रहार गरेको थियो । तर, गोली चितुवालाई नलाली स्थानीय असोक श्रेष्ठको घरको एक कोठामा पसेको थियो । स्थानीय एक मन्दिरमा लुकेर बसेको चितुवालाई जिल्ला वन कार्यालयका प्रमुख पुर्णेस्वर सुबेदी सहितको प्रहरी टोलीले नियन्त्रणमा लिने प्रयास गरिरहेको प्रमुख जिल्ला अधिकारी कृष्णप्रसाद ज्ञवालीले जानकारी दिुनभयो ।

source:-onlinekhabar