काठमाडौ, जेष्ठ २३ - पशुपतिनाथ मन्दिरदेखि माथितिरको वाग्मती नदीको सम्पूर्ण भाग ढलरहित हुने भएको छ । गोकर्ण-बौद्ध क्षेत्रका ढलको व्यवस्थापन गरेर तिलगंगामा मिसाए पनि गोठाटार-मूलपानी क्षेत्रका ढलको व्यवस्थापन हुन सकेको थिएन । गोकर्ण ब्यारेकदेखि गुह्येश्वरीसम्म ढलको निर्माण वि.सं. २०५४ मा सम्पन्न भएको थियो ।
अधिकारसम्पन्न वाग्मती सभ्यता एकीकृत विकास समितिले गोकर्ण-बौद्ध क्षेत्रका ढललाई गुह्येश्वरीमा ल्याएर प्रशोधन गर्दै आएको छ । यसरी गोठाटार-मूलपानी क्षेत्रका नयाँ बस्तीबाट निस्केका ढलहरू वाग्मतीमा सीधै मिसिन पुगेकाले पाँच किलोमिटर लामो ढल निर्माण कार्य तीव्रताका साथ भइरहेको आयोजना उपप्रमुख अनिलभद्र खनालले जानकारी दिए ।
हाल प्रत्यक्ष तीनवटा जति ढलहरू वाग्मतीमा मिसिएको भन्दै उनले अदृश्यरूपमा अझै केही बढी हुनसक्ने बताए । 'हाम्रो लक्ष्य अब दुई महिनाभित्र ढलरहित वाग्मती घोषणा गर्ने कार्यक्रम छ, गोठाटार-मूलपानी क्षेत्रको ढललाई मूल ढलमा मिसाएर प्रशोधन केन्द्रमा पुर्याउँछौं,' उनले भने ।
गोठाटार-मूलपानी क्षेत्रमा नयाँ बस्ती दिन प्रतिदिन बढ्दै गएकाले पनि ढल निकासको समस्या आएको हो । खहरे खोलामा पनि ढल मिसाउने प्रवृत्ति बढेकाले त्यसको निराकरणका लागि जनचेतनामूलक कार्य आयोजना गरिने उनको धारणा थियो । 'हामीले व्यापकरूपमा स्थानीय राजनीतिक दलका प्रतिनिधि, विद्यार्थी, नागरिक समाज लगायतका व्यक्तिलाई वाग्मती स्वच्छ र सफा राख्न आग्रह गछौ,' उनले
भने । सत्र किलोमिटर लम्बाइ रहेको ढलको लम्बाइ अब बाइस किलोमिटरको हुनेछ ।
अधिकारसम्पन्न वाग्मती सभ्यता एकीकृत विकास समितिका अध्यक्ष महेशबहादुर बस्नेतले वाग्मतीका सहायक नदीका ढल व्यवस्थापनका लागि छलफल भइरहेको जानकारी दिए । काम गर्ने इच्छाशक्ति भए वाग्मतीको पूर्ण भाग स्वच्छ र सफा राख्न सकिने उनले दाबी गरे । 'सहकार्य गरेर हामी वाग्मती मात्र होइन यसका सहायक नदीको पनि ढल व्यवस्थापन गर्न सक्छौं, मूल टिमको स्थिरता चाहियो,' उनले भने ।
वाग्मती सरोकार समितिका सदस्य जनार्द्धन खड्काले अधिकारसम्पन्न वाग्मती सभ्यताको टिम निकै सक्रियताका साथ लागिपरेकाले स्थानीयवासी पनि उत्साही भएको बताए । यदि यसरी तीव्र गतिमा काम अघि बढेमा पशुपतिसम्मको मात्र होइन अन्य भाग र शाखा नदीलाई पनि स्वच्छ र सफा राख्न सकिने दाबी गरे । कुरा मात्र नगरेर व्यवहारमा उतारौं, हालको टिम निकै जाँगरका साथ खटेको छ, त्यसकारण हामी आशावादी छौं, उनले भने । आयोजनाले गोठाटार-मूलपानी क्षेत्रको ढलका लागि एघार करोड विनियोजन गरेको छ ।
Kantipur Fm 
0 commentaires