जाजरकोट, २१ जेठ : मन्दिरमा फूल चढाएको भन्दै एक दलितलाई चरम यातना दिइएको छ । शुक्रबार भगवती-६ का जितबहादुर परियारलाई मन्दिर पसेको आरोपमा स्थानीय सुरेन्द्र शाही र मालबहादुर शाहीले यातना दिएका हुन् ।
स्थानीय भगवती मन्दिर प्रवेश गरी फूल चढाएको आरोपमा परियारलाई नियन्त्रणमा लिएर यातना दिएको दलित अधिकार संघर्ष समितिले जनाएको छ । कुटपिटबाट गम्भीर घाइते परियारको स्थानीय स्वास्थ्य संस्थामा उपचार भइरहेको छ ।
यसैबीच संयुक्त राजनैतिक दलित अधिकार संघर्ष समिति जाजरकोटले घटनाको विरोध गरेको छ । समितिले शुक्रबार विज्ञप्ति जारी गरी घटनाका दोषीलाई कारबाही नगरे आन्दोलनमा उत्रिने चेतावनीसमेत दिएको छ । '२१औँ शताब्दीमा पनि मन्दिर पसेको आरोपमा यातना दिनु ठाडो कानुनको उल्लंघन र मानवताविरोधी काम हो ।
दोषीलाई तत्काल कारबाही गर्न माग गर्दछौँ,' समितिका संयोजक पार्वती विकद्वारा हस्ताक्षरित विज्ञप्तिमा भनिएको छ । कानुनले छुवाछुत अन्त्यको घोषणा गरे पनि व्यवहारमा कार्यान्वयन हुन सकेको छैन । जाजरकोटका दुर्गम गाउँमा मात्र नभई सदरमुकाममा समेत दलितलाई घरभित्र पस्न रोक लगाउने गरिन्छ ।
nayapatrika
Kantipur Fm 
0 commentaires