चर्को गर्मीले तराई धपक्कै

२१ जेठ, वीरगञ्ज । गर्मी याम सुरु भएसँगै तराइका अधिकांश जिल्लामा चर्कोघाम लाग्नुका साथै अत्याधिक गर्मी बढेको छ ।  गर्मीका कारण यहाँका बासिन्दामा टाउको दुख्ने, रिङगटा लाग्ने तथा शरीर झम्झमाउने समस्याका साथै उच्च ज्वरोको प्रकोपसमेत फैलिएको छ । शरीरबाट अत्याधिक मात्रामा पसिना बग्दा शरीर आलस्य हुने भएकाले यस्ता रोगहरुको प्रकोप बढेको चिकित्सकहरु बताउँछन् । गर्मीबाट खास गरी बालबालिका र वृद्धबृद्धाहरु बढी प्रभावित भएका छन् ।  नारायणी उपक्षेत्रीय अस्पताल वीरगञ्ज र सगरमाथा अञ्चल अस्पताल राजविराजका अनुसार उच्च गर्मीसँगै टाउको दुखेका र ज्वरोका बिरामीको संख्या दिनप्रतिदिन बढ्दै गएको छ । अत्याधिक गर्मीका कारण दिउँसोको समयमा मध्य तथा पूर्वी तराइका सडक तथा स्थानीय बजारहरुमा मानिसको उपस्थिति हृवात्तै घटेर गएको छ । दैनिक ज्यालादारीमा काम गर्ने रिक्सा, टाङगा र ठेलागाडा चालकहरु गर्मीका कारण बढी मारमा परेका छन् ।  गर्मी याममा प्रसस्त मात्रामा पानी पिउन र फलफूल तथा शरीर चिसो बनाउने खाने कुरा सेवन गर्न चिकित्सकहरुको सुझाव छ ।

onlinekhabar