सभासदहरूको विजोग सुताइ

काठमाडौ, जेष्ठ १५ -   संविधानसभाको म्याद थप्न दलहरूका शीर्ष नेता वार्ता र छलफलमा व्यस्त भइरहँदा अरू सभासदले कसरी समय बिताए ?   केही सभासद क्यान्टिन र चउरमा चियागफमा थिए त केही खुल्ला चउर र विभिन्न कोठामा मस्त निद्रामा ।   शनिबार बिहान सवा ११ बजे निर्धारित समयभन्दा १४ घन्टा ढिलो गरी बैठक त सुरु भयो तर आधा घन्टा बसेर पौने १२ बजे १५ मिनेटका लागि सभामुख सुवास नेम्वाङले स्थगित गरे । १५ मिनेटमा -अर्थात्् १२ बजे) बैठक सुरु हुन नसकेपछि दिनभरि लखतरान सभासद बैठक कक्ष र संविधानसभाका विभिन्न हलमा मस्तसँग निदाइदिए ।    'बैठक बस्ने घोषणा भएकाले घर फर्किन मिलेन,' एक सभासदले कान्तिपुरसित भने, 'थकित भएकाहरू छिनभरमै निदाइएछ ।'  संविधानसभा बैठक कक्षका कुर्सी, सभासद प्रवेश गर्ने द्वारनजिकैको सानो हल, लबी, ल्होत्से हललगायत स्थानमा धेरै सभासद निद्रामा मस्त थिए । हुन त, व्यवस्थापिका संसद््को बैठक बिहान ८ बजे नै डाकिएको थियो र सभासद तोकिएकै समयमा संविधानसभा भवन पुगिसकेका थिए ।   'बैठक कुर्दाकुर्दै थाकियो,' माओवादी सभासद अक्कलबहादुर थिङले भने, 'अलि/अलि आराम त गर्नैपर्‍यो नि ।' आराम गर्दागर्दै केही सभासद कुर्सीमै निदाएका थिए ।   संविधानसभा भवनको ल्होत्से हलमा सभासदमात्रै होइन, कतिपय मन्त्री पनि भुइँमै निद्रामा थिए । १५ मिनेटमा बस्ने भनिएको बैठक सवा साढे तीन घन्टापछि सवा तीन बजे बसेको थियो ।   सवा तीन बजे बैठकका लागि जनाउ घन्टी बजेपछि विभिन्न कक्ष र हलहरूमा सुतेका सभासद हतारहतार बैठक कक्षमा भित्रिए । दोस्रो बैठक १५ मिनेट चल्यो । १५ मिनेटको बैठकपछि आधा घन्टाका लागि स्थगन गरियो । फेरि उनीहरू पुगे उसरी नै निदाउन । 

@kantipur