काठमाडौं, जेष्ठ १३ - संयुक्त लोकतान्त्रिक मधेसी मोर्चामा टुक्रिएर बनेका दुई नयाँ दल पनि सहभागी भएका छन् । मोर्चामा सहभागी दलको संख्या अब पाँच पुगेको छ ।
मोर्चामा तराई मधेस लोकतान्त्रिक पार्टीबाट टुक्रिएर बनेको तराई मधेस लोकतान्त्रिक पार्टी नेपाल र मधेसी जनअधिकार फोरमबाट टुक्रिएर बनेको मधेसी जनअधिकार फोरम (गणतान्त्रिक) पनि सहभागी भएका छन् । मोर्चामा यसअघि तमलोपा, फोरम लोकतान्त्रिक र सदभावना पार्टीमात्र थिए ।
दुई दल थपिएपछि मोर्चाको पहिलो बैठक शुक्रबार नै बसेको छ । बैठकले मधेसी दलबिना ठूला तीन दलले गरेको निर्णय स्वीकार नगर्ने निर्णय भएको फोरम लोकतान्त्रिका अध्यक्ष विजयकुमार गच्छदारले जानकारी दिए ।
मोर्चाले बहुलवादी संघीय लोकतान्त्रिक गणतान्त्रिक संविधान निर्माणको प्रतिबद्घता र अठोट आउनुपर्ने, राष्ट्रिय सहमतिको सरकार निर्माण गरी अघि बढ्नुपर्ने, लडाकु समायोजन र हतियार व्यवस्थापन, समग्र मधेस स्वायत्त प्रदेशको स्थापनाको प्रतिबद्धता, सेनामा मधेसी समुदायको समूहगत प्रवेशलगायतका माग अघि सार्दै आएको छ ।
0 commentaires