चौतारा, जेष्ठ ८ - राजधानीमा खानेपानी आपूर्ति गर्न सुरु गरिएको मेलम्ची आयोजनाको सुरुङ निर्माणको तोकिएको म्याद २ वर्ष थप्न ठेकेदार कम्पनीले आयोजनासँग आग्रह गरेको छ ।
बन्द, हडताल, राजनीतिक खिचातानी र स्थानीय समस्या देखाउँदै ठेकेदार चिनियाँ कम्पनीले सुरुङ पूरा गर्ने अवधि सन् २०१३ बाट बढाएर २०१५ सम्म पुर्याउन परामर्शदातामार्फत आयोजनासँग आग्रह गरेको हो । चाइना रेलवे कम्पनी १५ ब्युरोले ४ वर्षमा पूरा गर्ने सर्तमा २००९ अपि्रल २१ मा साइड जिम्मा लिएको थियो । बितेका २२ महिनामा १ हजार ९ सय मिटर सुरुङ निर्माण गरेको कम्पनीले म्याद बढाउने प्रस्ताव ल्याएको हो । 'सुरुङ निर्माण जुन गतिमा हुनुपर्ने हो त्यो देखिएको छैन,' आयोजनाका कार्यकारी निर्देशक हरिप्रसाद शर्माले भने । 'म्याद थप्न परामर्शदातालाई पत्राचार गरेको खबर आएको छ । नेपालको आन्तरिक समस्याले काम गर्न ढिलो भएको कारण देखाउँदै यसअघि पनि ठेकेदारले म्याद बढाउन अनौपचारिक अनुरोध गर्दै आएको हो,' उनले भने । परामर्शदाताले औपचारिक जानकारी भने नदिएको उनले बताए । 'जटिल अवस्थाबाहेक सकभर म्याद थप्ने पक्षमा छैनौं, उनले भने । आयोजनाको ग्याल्थुम, अम्बाथान, सिन्धु र सुन्दरीजलबाट सुरुङ निर्माण भइरहेको छ । आयोजनाले दैनिक १ सय ५० मिटरको लक्ष्य राखेकोमा हाल ११ देखि १४ मिटर सुरुङ निर्माण भइरहेको छ । यही रफ्तारमा काम गर्ने हो भने सुरुङ निर्माण पूरा हुन थप ५ वर्ष कुर्नुपर्छ । समयमा निर्माण पूरा नहुने निश्चित भएपछि कम्पनीले जरिवाना तिर्नुपर्ने डरले म्याद बढाउन आग्रह गरेको हो, आयोजना स्रोतले भन्यो, स्थानीय वातावरण सहज भए पनि ठेकेदारले उसकै कारणले काम गर्न सकेन । दैनिक ५ सय कामदार हुनुपर्नेमा हाल ३ सय मात्र छन् । कम्पनीले आवश्यक उपकरण र कामदार ल्याउन सकेन, आयोजनाका एक प्राविधिक भन्छन् । आयोजनाका अनुसार तोकिएको समयमा काम पूरा गर्न नसके पनि ठेकेदारलाई ४० करोडभन्दा बढी जरिवाना गर्न नसक्ने टेन्डर सर्तमा उल्लेख छ । ठेकेदारले जरिवानाबाट जोगिन विभिन्न घटनालाई जोडेर थप रकम दाबी गर्दै २१ वटा निवेदन आयोजनामा दर्ता गरिसकेको छ । ठेकेदारले स्थानीयले आयोजनाको कार्यालय मेलम्चीमा ०६६ साउनदेखि ७ महिना ताला लगाएको, कारणलाई आधार बनाएर थप्न दबाब दिएको छ ।
via ekantipur
0 commentaires