मिथिलेश यादव, सिरहा, जेठ १४- सिरहाको रामनगर मिर्चैया-३ स्थित एक निजी पेट्रोल पम्पको पर्खाल खस्दा शनिबार किचिएर एक बालिकाको मृत्यु भएको छ। उनकी आमासहित दुई जना घाइते भएका छन्। घटनामा टेकनारायण साहकी २ वर्षीया छोरी कविता साहको मृत्यु भएको हो। शिला ट्रेड लिङ्क नामक पेट्रोल पम्पको पछाडिको पर्खाल खस्दा टाँसिएकै घर भएका टेकनारायाणकी छोरीसहित तीन जना च्यापिएका थिए। च्यापिएको अवस्थामा इलाका प्रहरी कार्यालय मिर्चैयाको प्रहरी टोली उद्दार गर्ने क्रममा पुगेको थियो तर बालिकाको मृत्यु भइसकेको थियो। उनकी आमा सरितादेवी र अर्की फरिदा खातुनलाई भने घाइते अवस्थामा उद्दार गरिएको प्रहरी निरीक्षक बासुदेव खतिवडाले बताए। घाइतेको उपचार मिर्चैयास्थित निजी नर्सिङ होममा भइरहेको र अवस्था खतरामुक्त रहेको खतिवडाले बताए। बिहानदेखि परेको वर्षाका कारण पर्खाल भत्केको प्रहरीले बताए। नयाँ निर्माण गरिएको पर्खाल राम्ररी सेट नभएकाले भत्केको प्रहरीको प्रारम्भिक अनुमान छ। अचानक आएको पानीले घरबाहिर रहेको सामान भित्र सार्ने क्रममा हेर्दाहेर्दौ पर्खाल खस्यो, काखमा रहेकी छोरीसहित मलाई पनि किचे- घाइते सरिताले भनिन्। पर्खाल खसेको देख्दादेख्दै जिउंमै आएर थिच्यो, त्यसपछि केही पत्तै पाइन्- उनले भनिन्। अस्पतालको सैय्यामा उपचार गराइरहेकी उनी, घरीघरी छोरी खोजिरहन्छिन्। उनका पति रोजगारका क्रममा बाहिर रहेको प्रहरीले जनाएको छ। अर्की घाइते फरिदाले भनिन्- पानी पर्न थाले पनि बरन्डामा ओत लागेकी थिएँ, अचानक च्यापिएँ, केही पत्तै पाइन्।
समाचार
»
पर्खाल खस्दा किचिएर छोरीको मृत्यु, आमा घाइते
पर्खाल खस्दा किचिएर छोरीको मृत्यु, आमा घाइते
Tags:
समाचार
0 commentaires