सडक पुनःनिर्माण कार्य सम्पन्न

भक्तपुर, जेठ ७ - डिभिजन सडक कार्यालयले भक्तपुरको सानोब्यासीबाट ठूलोब्यासीसम्मको सडक पुनःनिर्माण कार्य सम्पन्न गरेको छ ।भक्तपुरबाट नगरकोट जाने मुख्य पर्यटन मार्गका रूपमा रहेको उक्त सडकमा ठूल्ठूला खाल्डा तथा पानी जम्ने समस्या बढेपछि सडक पुनःनिर्माण गरिएको कार्यालयका प्रमुख कर्णबहादुर रानाभाटले बताए।      रु एक करोड ९४ लाखको लागतमा उक्त सडकको मर्मतसम्भार गरिएको जानकारी दिँदै उनले सडकको नाली तथा ढलको मर्मतसम्भारको कार्य आगामी असार मसान्तसम्म सम्पन्न गरिने बताए।  त्यसैगरी, सडक कार्यालयले ठिमी-बोडे-काठमाडौँ-मूलपानी सडकको पनि मर्मतसम्भार सुरु गरेको छ।  रु २५ लाखको लागतमा उक्त कार्य सम्पन्न गर्ने योजना रहेको प्रमुख रानाभाटले उल्लेख गरे।  यो सडकमा स्थानीय बासिन्दाले ढल र नालीसमेत बाटोमै छाडिदिनाले कालोपत्रसमेत पटकपटक बिग्रिएको स्थितिलाई ध्यानमा राखी यो सडकमा ढलान गरेर स्तरोन्नति गरिएको छ।  त्यसैगरी, नेपाल पर्यटन वर्षलाई लक्ष्यित गरी डिभिजन सडक कार्यालयले केही सडकको स्तरोन्नति गर्ने कार्यसमेत सम्पन्न गरेको छ।  कार्यालयले सल्लाघारीचोक-नगरकोट, सल्लाघारीबाट दरबारक्षेत्र जोड्ने बाटो, जगाते-कमलविनायक, देकोचा-चाँगुनारायण र चाँगुनारायण-साँखु सडक विस्तार गरेको छ। - रासस