फोरम गणतान्त्रिकका सभासद् रातारात धुलिखेलतिर

सवैका मोवाइल 'स्वीच अफ'

१० जेठ, काठमाण्डौ । मधेसी जनाधिकार फोरमबाट छुटेर मधेसी जनाधिकार फोरम गणतान्त्रिक खोलेका नेता जेपी गुप्ताले आफ्नो पक्षमा हस्ताक्षर गर्ने सभासद्लाई रातारात धुलिखेल पुर्‍याएका छन् ।

आफ्नो पक्षमा हस्ताक्षर गरेपनि फोरमको संस्थापन पक्षमै र्फकन सक्ने सम्भावना रहेकाले उनीहरुलाई काठमाण्डौं बाहिर लगेर राखिएको बताइएको छ । सोमबार साँझ एउटै गाडीमा राखेर धुलिखेल पुर्‍याइएका फोरम गणतान्त्रिकका सबै सभासद्लाई एक रिसोर्टमा राखिएको बिश्वस्त सूत्रले जनाएको छ ।

गुप्ताका पक्षमा हस्ताक्षर गर्ने कतिपयको नक्कली हस्ताक्षर भएको र उनीहरु आफ्नै पक्षमा रहेको फोरमको संस्थापन पक्षले दावी गरेको छ । मन्त्री नबनेको झोंकमा गुप्तातिर लागेका सभासद्हरु मन्त्रीको आश्वासन पाए पुनः संस्थापन पक्षतिर फर्किनसक्ने देखिएपछि गुप्ताले उनीहरुलाई काठमाण्डौं बाहिर लगेर राखेका हुन् ।

यो समाचार तयार पार्दासम्म फोरम गणतान्त्रिकका सवै सभासद्को फोन अफ छ । अध्यक्ष गुप्तासहित सवै सभासद् अहिले धुलिखेल रिसोर्टमा रहेको बताइएको छ । गुप्ता आजै ४ बजे फर्किएर निर्वाचन आयोगमा जाने तयारीमा रहेको बताइएको छ ।

via  onlinekhabar