बुहारीहरू घाँसपातमै ठिक्क हुने र पुरुषहरू पनि नभएका वेला गाउँमा आएको विकास फिर्ता जाला भनेर आफूहरू लागि परेको ७० वषर्ीया जगुली बोगटीले बताइन्
डोटी, २७ पुस दक्षिण डोटीको बोगटान क्षेत्रका दुर्गम गाउँ अचेल पुरुषविहीन छन् । गाउँका सबैजसो पुरुष रोजगारीका लागि भारत गएकाले गाउँका जुनसुकै काममा महिला नै अघि सर्नुपर्ने बाध्यता छ ।
भारतका विभिन्न सहरमा चौकीदारी गर्ने पुरुष एकमहिने बिदामा गहुँखेती लगाएर मंसिर अन्तिमतिर फर्केपछि गाउँ पुरुषविहीन भएका हुन् । पुरुष नभए पनि गाउँको विकास-निर्माण भने रोकिएको छैन ।महिलाहरू पुसको जाडोको कुनै पर्वाह नगरी गाउँमा मोटर पुर्याउन आफैँ बाटो खन्न जुटेका छन् । दक्षिणी डोटीको बोगटान क्षेत्रमा पर्ने गगुडा, सातफरी र चवराचौतारा गाविसका एक हजारभन्दा बढी महिला आ-आफ्नो समूहमार्फत घरघरबाट सब्बल र घैटी लिएर आफैँ बाटो खन्न जुटेका हुन् ।
नातिनातिना काखी च्यापी तातो ओछ्यानमा बस्नुपर्ने उमेरका महिलाहरू एकसाथ कम्मर कसेर सडक खन्न लागिपरेका छन् । गाउँमा मोटरबाटो पुर्याउने वर्षौंदेखिको धोको पूरा गर्न बुढेसकालमा पनि बाटो खन्न तम्सिएको उनीहरू बताउँछन् । पुरुषको भर पर्दा गाउँमा गाडी गुडेको देख्ने सपना चाँडै पूरा नहुने भएकाले आफैँ अघि सरेको पलाडीकी ७० वर्षीया जगुली बोगटीले बताइन् ।
जिटिजेडको आर्थिक सहयोगमा ग्रामीण पहुच कार्यक्रमअन्तर्गत सोर्स नेपालको सहजीकरणमा खनिन लागेको २६ किलोमिटरमध्ये १० किलोमिटर सडक खन्न बिहानैदेखि उनीहरू जुट्ने गरेका छन् । काम गरेबापत जिटिजेडले प्रतिदिन प्रतिव्यक्ति दुई सय ५० रुपैयाँ दिने गरेकाले पनि महिला उत्साहित भएका हुन् । 'दुई दिन हिँडेर दिपायलबाट चामल किनेर ल्याउँथ्याँै, अब गाडी चल्न थालेपछि सस्तो मूल्यमा गाउँमै चामल किन्न पाइन्छ भनेर ठन्डी नभनी बाटो खन्न लागेका हौँ,' गगुडा गाविस-२ पलाडीकी ७१ वषर्ीया भागादेवी बोगटी भन्छिन् ।
बुहारीहरू घाँसपातमै ठिक्क हुने र पुरुषहरू गाउँमा नभएका वेला गाउँमा आएको विकास फिर्ता जाला भनेर आफूहरू लागि परेको पलाडीकी ७० वर्षीया जगुली बोगटीले बताइन् । 'चार महिनामा तीन किलोमिटर सडक खनिसक्यौँ, असारसम्म १० किलोमिटर बाटो गाडी गुडाएरै छाड्नेछौँ,' उनी भन्छिन् ।
तिखात्तर-चबराचौतारा सडक नामकरण गरिएको सो सडक खन्नका लागि ६६ वटा समूह गठन गरिएको छ । गगुडा, सातफरी र चबराचौतारा गाविसका प्रत्येक घरका एकजना गरी सात सयभन्दा बढी दलित र गैरदलित महिलाले सडक खन्ने काम गरिरहेको ग्रामीण पहुँच कार्यक्रमका जिविस फोकल पर्सन हिक्मत रोकायाले बताए ।
आ-आप\mनो समूहमार्फत काममा लागेका यहाँका महिला ढुंगा फोर्ने, ग्याबिन जाली भर्नेलगायत सबै काम गर्न थालेका छन् । महिला समूहद्वारा खनिन लागेको सो सडकको लम्बाइ ३१.१ किलोमिटर रहेको र सोको बजेट रकम १३ करोड रहेको जिविस फोकल पर्सन रोकायाले जानकारी दिए । तीन वर्षअघिदेखि सुरु गरिएको बाटो निर्माणको काम असारमा सम्पन्न हुने र त्यति वेलासम्म तिखात्तरदेखि चबराचौतारासम्म गाडी पुर्याई छोड्ने परियोजनाको लक्ष्य रहेको उनको भनाइ छ ।
source:-nayapatrika
Kantipur Fm 
0 commentaires