काठमाडौ, माघ ६ - प्रधानमन्त्री माधवकुमार नेपालले महिलामाथि हुने हिंसा विरुद्धको अभियानलाई प्रभावकारी रुपमा अगाडि बढाउन निर्देशन दिएका छन् ।
बिहीबार प्रधानमन्त्री कार्यालयद्वारा आयोजित अन्तर मन्त्रालयस्तरीय समिति लैङ्गिक हिंसाविरुद्धको राष्ट्रिय कार्ययोजना बैठक कार्यक्रममा प्रधानमन्त्रीले उक्त निर्देशन दिएका हुन् ।
मुख्य सचिव माधव घिमिरेको अध्यक्षतामा सम्पन्न बैठकमा सभासद्हरु सपना प्रधान मल्ल, आरजु देउवा तथा उषाकला राईका साथै मन्त्रालयका सचिवहरु, प्रहरी महानिरीक्षक रमेश चन्द ठकुरी लगयातका उच्चपदस्थ अधिकारीहरुको सहभागिता रहेको थियो ।
बैठकमा बोल्दै प्रधानमन्त्री नेपालले सबै मन्त्रालय तथा अन्य निकायहरुको समन्वय विना महिलामाथि हुने हिंसा विरुद्धको अभियान प्रभावकारी हुन नसक्ने भएकाले समन्वयतात्मक प्रयासबाट अगाडि बढ्न निर्देशन दिएका हुन् ।
एक बर्षअघि प्रधानमन्त्री कार्यालयमा महिला हिंसाविरुद्धको उजुरी कार्यान्वयन सेल गठन गरेर बढाइएको अभियानबाट सकारात्मक उपलब्धि हाँसिल भएको चर्चा गनुहुँदै प्रधानमन्त्रीले आवश्यकता अनुसार इकाईलाई अझ प्रभावकारी रुपमा अगाडि बढाउनुपर्नेमा जोड दिए ।
उनले लैङ्गिक हिंसा विरुद्धको कार्ययोजना कार्यान्वयन गर्न वार्षिक कार्ययोजना कार्यान्वयन गर्दै अगाडि बढ्नुपर्नेमा जोड दिए । ७५ वटै जिल्लामा गठन भएका स्रोत समूहहरुको आवश्यकता अनुसार क्षेत्रीय र राष्ट्रिय भेला गर्न पनि निर्देशन दिए ।
उनले महिलामाथि हिंसा गर्ने जो सुकै भए पनि तत्काल कारबाही गर्न निर्देशन दिंदै ५-१० वटा त्यस्ता मुद्दामाथि तत्काल कारबाही भएको तथ्य प्रचार हुने बितिक्कै महिलामाथि हुने हिंसा क्रमशः घट्दै जाने विश्वास व्यक्त गरे ।
अपराधीमाथि हुने कारबाहीको सिलसिलामा कानुनी सुधार आवश्यक रहे कडा कानुन बनाउने कार्यमा समेत आफ्नो साथ रहने स्मरण गराउँदै प्रधानमन्त्रीले महिला प्रहरीहरुको क्षमता तथा मनोवल अभिवृद्धिमा पनि जोड दिनुपर्ने बताए । त्यस्तै उनले सबै निकायमा महिला मैत्री वातबरण सिर्जना गरिनुपर्नेमा पनि जोड दिए । बैठकमा उच्च सरकारी अधिकारीहरुले महिला हिंसा विरुद्धको अभियानमा आ-आफ्ना निकायबाट भएका प्रगति विवरण प्रस्तुत गरेका थिए ।
source:-ekantipur



0 commentaires