कार्यकर्ता हत्याको विरोधमा अनिश्चितकालीन रौतहट बन्दको आह्वान

रौतहट १० माघ एकीकृत नेकपा माओवादी रौतहटले कार्यकर्ताको हत्याको विरोधमा आजदेखि अनिश्चितकालीन जिल्ला बन्दको आह्वान गरेको छ । माओवादी भोजपुरा राज्य समितिकी सदस्य रुक्साना खातुनको हत्या भएको विरोधमा माओवादीले अनिश्चितकालीन रौतहट बन्दको आह्वान गरेको हो । एक विज्ञप्ति प्रकाशित गरि हत्यामा संलग्नलाई तत्काल पक्राउ गरि कार्वाही गर्न र हत्या गरिएकी खातुनलाई सहिद घोषणा गर्न माग गरी बन्दको आह्वान गरेको हो । माओवादी रौतहटका इन्चार्ज अशोक जयसवाल र सहइन्चार्ज उपेन्द्र साहद्वारा संयुक्त हस्ताक्षरित उक्त विज्ञप्तिमा बन्द अवधिभर एम्बुलेन्स, चिकित्सक, सन्चारकर्मी कुटनीतिक नियोग, पर्यटकलगायत अत्यावश्यक सवारीसाधन भने चल्न दिने जनाइएको छ । यसैबीच खातुनको हत्याको जिम्मेवारी सशस्त्र भूमीगत संगठन जनतान्त्रिक तराई मधेश मुक्ति पार्टीले लिएको छ । पार्टीका केन्द्रीय अध्यक्ष भगत सिंहले स्थानीय सन्चारकर्मीहरुलाई टेलिफोन गरी पार्टीबिरुद्ध सुराकी गरेकोले आफ्ना रौतहट जिल्ला इन्चार्ज नेतृत्वको टोलीले खातुनको हत्या गरेको दावी गरेका छन् । खातुनको हत्यामा संलग्न रहेको आशंकामा प्रहरीले रौतहटको सर्बठा गाविसको छतौना टोलबाट एकजनालाई नियन्त्रणमा लिएको छ ।