प्रहरी र बन्दकर्ताबीच झडप, तीन दर्जन घाइते

Share

मिथिलेश यादव, लहान, माघ ८- सिरहाको गोलबजारमा प्रहरी र बन्दकर्ताबीच भएको झडपमा तीन दर्जन घाइते भएका छन्। बिहीबार राति अपहरित असनपुर-४ का १९ वर्षीय सरोज साहलाई छुटाउन प्रहरी उदासिन बनेको भन्दै राजमार्ग बन्द गरेका गोलबजारबासी र प्रहरीबीच झडप भएको हो।


झडपमा परी सख्त घाइते भएका असनपुर-७ का दीपनारायण राउतको उपचार लहान नर्सिङ होममा भइरहेको छ। पूर्व-पश्चिम राजमार्गको गोलबजार खण्डमा टायर बालेर गरिएको चक्का जाम खुलाउने क्रममा प्रहरीले लाठीचार्ज गर्दा झडप भएको जिल्ला प्रहरी कार्यालय सिरहाले जनाएको छ। झडपमा परी प्रहरी पनि घाइते भएको सिरहा प्रहरी नायव उपरीक्षक नरेन्द्र उप्रेतीले बताए।

प्रहरीले बल प्रयोग गरी राजमार्ग सुचारु गराए पनि गोलबजारका पसल शैक्षिक संस्था पूर्णरुपले बन्द छ। पुनः राजमार्ग बन्द गराउन सक्ने सम्भावनालाई मध्यनजर गरी गोलबजारमा ब्यापक सुरक्षाकर्मी परिचालन गरिएको छ। झडपपछि यहाँ तनाव छ।

साहलाई नछुटाए शनिबार बिहानैबाट आन्दोलन गर्ने गोलबजार व्यापार सङ्घ र स्थानीयले शुक्रबार विज्ञप्तिमार्फत सार्वजनिक गरेका थिए।

गोलबजारमा शिवालय मनी ट्रान्फर चलाउँदै आएका साह बिहीबार राति पसल बन्द गरी असनपुर-४ स्थित घर फर्कंदै गर्दा गोलबजारको निपाने चोकमा हतियारसहितका समूहले अपहरण गरेको प्रत्यक्षदर्शी साहका दाइ विनोद साहले बताए।

source:-nagriknews