रुबी रौनियार, काठमाडौं, पुस २९- उच्चमाध्यमिक शिक्षा परिषद्ले कक्षा ११ को परीक्षाको नतिजा बिहीबार प्रकाशन गर्दैछ। यसका लागि तयारी भइरहेको परिषद्ले जनाएको छ। परिषद्का सदस्यसचिव भिमलाल गुरुङले परीक्षाको नतिजा प्रकाशनको काम अन्तिम चरणमा पुगेको नागरिकन्युजलाई बताए।
'कक्षा ११ का विभिन्न सङ्कायका ४ लाख ३० हजार परीक्षार्थीको नतिजा आज ५ बजे प्रकाशित गर्ने तयारीमा लागेका छौं', सदस्यसचिव गुरुङले भने- परिषद्का कर्मचारी नतिजा प्रकाशन गर्न परीक्षार्थीको नतिजालाई कम्प्युटरमा अपडेट गरिरहेका छन्। यस वर्ष नतिजा प्रकाशनमा १ महिना ढिलाई भएको छ।
परिषद्का सदस्यसचिव र उपाध्यक्षको कार्यकक्षमा तीन महिनाअगाडि अखिल नेपाल केन्द्रीय समिति, अखिल क्रान्तिकारी केन्द्रीय समिति र नेपाल राष्ट्रिय कर्मचारी सङ्घले विभिन्न मागसहित गरेको तालाबन्दीले नतिजा प्रकाशनमा ढिलाई भएको गुरुङले बताए।
परिषद्मा तीन महिनादेखि तालाबन्दीले परीक्षाको नतिजा प्रकाशनको कामकारबाही रोकिएको र जेठमा माओवादीको आन्दोलनले गर्दा परीक्षा २ हप्ता सरेकाले यस वर्षको नतिजा प्रकाशन ढिलो भएको उनले स्वीकारे।
गत वर्ष कक्षा ११ को नतिजा मङ्सिर पहिलो साता प्रकाशित भएको थियो।
source:-nagriknews


0 commentaires