विवाहको भोलीपल्टै बेहुला बेपत्ता

नवदीप अजनवी  नुवाकोट, मंसिर २१ विवाह भएको भोली पल्टै दुलाहा वेपत्ता हुन्छन् भने नवदुलहीको हालत कस्तो होला । कुनै पनि नवदुलहीले विहे गरेको भोली पल्टै आफ्ना दुलाहा वेपत्ता होलना भन्ने कल्पना समेत गरेका हुँदैनन । यस्तै कल्पना नगरेको आपत आइ परेको छ नुवाकोट तुप्चे भैरमकोटकी पवित्रा रिजाललाई ।  सोमवार त्रिशुली राम मन्दिरमा मागी विवाह गरेकी पवित्रा आफ्ना दुलाहा दुईपिपल गाविस वडा नं. २, दाहालथोकका २७ बर्षिय अर्जुन दाहाल वेपत्ता भएपछि विलखबन्दमा पर्नुभएको छ । काठमाडौंमा स्काइ केवलमा काम गर्ने अर्जुन तुप्चे भैरमकोटकी  पवित्रासँग सोमवार विवाह गर्नुभएको थियो । मंगलवार एकादशी परेका कारण वुधवार भोज गर्नका लागि तयारी भइरहेको थियो । 

त्यही बेला मोबाइलमा फोन आएपछि दुलाहा अर्जुन साथीले फोन ग¥यो उसलाई लिन जान्छु भन्दै हिंड्नु भयो । त्यसपछि २४ घण्टा वितिसक्दा समेत अर्जुन फर्कनु भएको छैन । विहेको भोजको निम्ता पाएका आफन्तहरु वुधवार भोज खान अर्जुनको घरमा पुगे पनि दुलाहा नभेटेपछि निराश हुँदै फर्किएका छन् । परिवारका अनुसार ‘साथीको फोन आयो लिन जान्छु’ भन्दै बाहिरीए पछि उहाँ वेपत्ता हुनु भएको हो । अर्जुनलाई कसको कति नम्बरबाट किन फोन आएको थियो भन्ने परिवारलाई थाहा भएको छैन । ‘भोजको तयारी भइरहेको थियो, एक्कासी वेहुला हराएपछि विखलबन्दमा प¥यौ,’ बेहुलाका छिमेकी नारायण दाहालले भन्नुभयो ‘रातभर खोज्यौ, तर कही पनि भेटिएनन् ।’   खोजीका लागि प्रहरी प्रशासनमा खवर गरेको भए पनि बुधबार साँझसम्म कुनै पत्तो लागेको छैन । घर बाहिर निस्किएको केही समयसम्म त परिवारले भोजमा आउने कुनै साथीलाई लिन गएको होला भन्ने लागेको तर उनी नफर्के पछि अपहरण पो भयो कि भन्ने शंका लागेको अर्का छिमेकी प्रल्हाद दाहालले बताउनुभयो । बेपत्ता बेहुलाले तीन वटा मोवाइल बोक्ने गरेको र कुन मोबाइलमा कति नम्बरबाट फोन आएको भन्ने समेत पत्तो लागेको छैन । उहाँले बोक्ने सबै मोवाइल रातीदेखी नै स्वीच अफ रहेको परिवारले जानकारी दिएको छ । परिवारको भनाइको आधारमा अर्जुनको कसैले अपहरण गरेको हुन सक्ने अनुमान नुवाकोट प्रहरीले गरेको छ ।

                                                                                                                                 उज्यालो