अनलाइनमा रम्दै कलाकार

स्मृति ढुंगाना, काठमाडौं, मंसिर १२- मनोरञ्जन क्षेत्रका 'सेलिब्रेटी'हरू इन्टरनेटप्रेमी हुँदै गएका छन्। धेरैले फ्यानसँग सम्बन्ध बढाउने माध्यमको रुपमा यसको प्रयोग गर्न थालेका छन्। एकदिन लाइन काटिएर नेट चलाउन नपाउँदा अभिनेता राजवल्लभ कोइरालालाई निकै पीर परेको छ। 'अस्ति बिहानै इन्टरनेटको लाइन काटिएछ। कसरी दिन बिताउने भन्ने तनाव भइहाल्यो,' समाचारको लागि धेरैजसो इन्टरनेटमै निर्भर रहने कोइरालाले भने।  

दैनिक तीन घन्टा 'अनलाइन'मा रहने साथीसँग नजिक रहन जिमेल र फेसबुक चलाउँछन्। 'दर्शकसँग पनि कुरा गर्छु। धेरै जना अनलाइन हुँदा कुरा गर्न भ्याइनभ्याइ हुन्छ,' फेसबुकबाटै प्रेम प्रस्ताव राख्ने फ्यानसमेत भेटेका छन् उनले। आठ वर्षखि इन्टरनेट प्रयोग गर्दै आएका कोइरालाले फिल्मी गतिविधिबारे 'अपडेट' हुन यो माध्यमलाई उपयोगी ठानेका छन्।  मिस नेपाल मलिना जोशी दिनमा एकपटक इन्टरनेट प्रयोग गर्न चुक्दिनन्। फेसबुक, हटमेल, यु ट्युब, गुगल र न्युजसाइटहरू उनको प्राथमिकतामा पर्छ। 'कुनै दिन नेट प्रयोग गरिन भने के के छुटे जस्तो लाग्छ,' संसारमा भइरहेका घटनाक्रमबारे जानकारी लिन समाचारमूलक साइट सर्च गर्ने उनले बताइन्।  सुरुमै फेसबुक खोल्ने उनको बानी छ। 'धेरै साथीहरु भेटिन्छन्। 

फ्यान पेजबाटै शुभचिन्तकको जवाफ फर्काउँछु,' उनले भनिन्। नौ कक्षा पढ्दा इन्टरनेट चलाउन सिकेकी मलिनालाई विदेशी ग्ल्यामर साइट हेर्ने बानी परेको छ।  अभिनेत्री हर्षिका श्रेष्ठलाई इन्टरनेटभन्दा टेलिभिजनको लतले बढी सताएको छ। तैपनि दिनको दुई घन्टा उनले इन्टरनेट प्रयोगका लागि छुट्याएकी छिन्। फेसबुक, हलिउड डटकम, गुगल र याहु उनले बढी प्रयोग गर्ने साइट हुन्। 'अनलाइन'मा कम बस्न रुचाउने हर्षिकाले देश विदेशका समाचार थाहा पाउन न्युजसाइट हेर्ने गरेको जानकारी दिइन्।  'धेरै मानिस एकैपटक अनलाइन हुने हुदाँ जवाफ फर्काउन भ्याइनभ्याइ हुन्छ। नबोल्दा रिसाउँछन्। त्यसैले अनलाइनमा कमै बस्छु,' उनले भनिन्। साहित्यमा रुचि राख्ने हर्षिकाले यस्ता साइट पनि चाहर्छिन्।  कम्तीमा दिनको एक घन्टा नेट प्रयोग गर्ने बानी छ गायक निमा रुम्बाको। इमेल चेक, फेसबुक र आफ्नो वेबसाइट अपडेट, उनको दैनिक तालिका हो। समाचारको लागि भने इन्टरनेटभन्दा पत्रपत्रिका उनको छनोटमा पर्छ। उनी संगीत सम्बन्धी विभिन्न साइट हेर्छन्। १३ वर्ष भयो उनले इन्टरनेट चलाउन थालेको।  'सुरूसुरुमा अनलाइन बस्न रहर लागे पनि अहिले अफलाइन बस्छु,' गुगल र जिमेल उनलाई उपयोगी लाग्छ।  चित्रकार विधाता केसी भने आधा घन्टाभन्दा बढी इन्टरनेट खोल्दिनन्। अपडेट गर्नै नभ्याएकोले आफ्नो वेबसाइट 'एक्सपायर' भएको उनले सुनाइन्। हटमेल, फेसबुक, सिएनएन र आर्ट डेली उनले नियमित प्रयोग गर्ने साइट हुन्। नयाँ वेबसाइट चलाउने तयारीमा रहेकी विधाताले भनिन्, 'शुभचिन्तकहरू आर्टसम्बन्धी विषयबारे प्रश्न गर्नुहुन्छ। सुझाव पनि दिनुहुन्छ,' उनलाई लाग्छ, 'कहिलेकाहीँ अनलाइन बस्नु राम्रो हो। तर, इमेल चेक गर्दा र अत्यावश्यक वेबसाइट हेर्दैमा मेरो समय जान्छ।'  एउटा नाटकको तयारीमा व्यस्त भएपछि अभिनेत्री नम्रता श्रेष्ठ इन्टरनेटबाट टाढिएकी छिन्। 'काममा व्यस्त भएकीले नेट चलाउन पाएकी छैन,' एक हप्तादेखि इन्टरनेटबाट विमुख रहेको उनले बताइन्। फुर्सदमा दिनको ६ घन्टासम्म नेटमा कटाएको उनको अनुभव छ। फेसबुक, गुगल र याहु नै हुन् उनले प्रयोग गर्ने साइट। प्रायः अनलाइनमा धेरैसित कुरा नगर्ने नम्रताले फेसबुकबाट राम्रा साथीहरू पाएको समेत पाएकी छिन्। आफ्नो इमेल एकाउन्ट दुई पटकसम्म ह्याक भएको उनले सुनाइन्। 'फेसबुकबाटै धेरै कुराको जानकारी पाउँछु,' उनले भनिन्।

को कति समय?
राजवल्लभ कोइराला, ३ घन्टा, समाचारमूलक साइट
मलिना जोशी, कम्तीमा एक पटक, फेसबुक, हटमेल, न्युज साइट
हर्षिका श्रेष्ठ, २ घन्टा, समाचार र साहित्यिक साइट
निमा रुम्बा, १ घन्टा, इमेल चेक, फेसबुक
विधाता केसी, आधा घन्टा, फेसबुक, सिएनएन, आर्ट डेली
नम्रता श्रेष्ठ, फुर्सद हुँदा ६ घन्टासम्म, फेसबुक, गुगल र याहु