शहिदका नाममा चार बर्षदेखि अखण्ड धुनी र शान्ति दिप

 झापा साउन २० मध्य झापाको धार्मिक तथा पर्यटकिय स्थल दोमुखामा एक सन्तले शहिदहरुका नाममा चारबर्षदेखि अखण्ड ध्वनी र दिप प्रज्वलन गरिरहेका छन् । देशमा अशान्ति बढ्दै गएको र देश र जनताका नाममा कैयन मानिसहरुले ज्यान गुमाएपछि यी सन्तले यहाँको श्री श्री श्री बैष्णवी मन्दिरमा यो अभियान चलाएका हुन् । मन्दिरभित्र रहेको दिप नजिकै उनले सुचनामा लेखे अनुसार लोकतान्त्रिक आन्दोलन, माओबादी जनयुद्धमा मृत्यू भएका लडाकु, प्रहरी, सेना, सर्वसाधरण र हवाइ दुर्घटनामा ज्यान गुमाउनेहरुको आत्माले चीर शान्ति पाओस् भनेर यो दिप प्रज्वलन र अखण्ड धुनी गरिएको छ । ‘धार्मिक मान्यताबाट राजनीतिमा लागेर देश र जनताका निम्ति मरेका शहिदको आत्माको शान्तिको कामना गर्न यसो गरेको हुँ’ सन्त नन्दी बाबा अधिकारीले भने ।  उनले मन्दिर अखण्ड धुनी र दिप बालेका ठाउँमा हालसम्मका शहिद र बिभिन्न आन्दोलनमा देहवसान भएका राजनीतिक ब्यक्तिहरुका तस्बिर ल्याइदिन आग्रह गरेका छन् ।उनले दलका केही नेता र स्थानिय ब्यक्तिहरुलाई समेत यस्तो आग्रह गरेको बताए । पृथ्वी नारायण शाहका पालादेखि २००७,२०४६,२०६३ सालका शहिद, माओबादी युद्धमा लागेर मरेका छापामार, प्रहरी, सेना, सर्वसाधरण र मधेस आन्दोलनमा मारिएकाहरुका तस्बिर आफूले राख्न चाहेको अधिकारीले बताए ।     शहिदका नाममा धुनी र दिप बालेको खबर सुनेर केही समय पहिले इलामकी एक महिला यहाँ आएकी थिइन् । द्वन्द्वका क्रममा लमजुङ्गमा मारिएका आफ्ना प्रहरी श्रीमानका नाममा उनले पनि यहाँ आएर बाती बालेर गइन् ।पछिबाट उनले मन्दिरमा एउटा ब्यानर ल्याएर छोडेकी छन् ।त्यसमा लेखिएको छ ‘ब्यबस्था परिवर्तनका लागि भएका माओबादी यूद्ध, जनआन्दोलन र अन्य आन्दोलनमा ज्यान गुमाउनेका लागि यहाँ भएको अखण्ड धुनी र दिप प्रज्वलनले मृत आत्माले चिर शान्ति पाओस् भन्ने चाहन्छु ।’ ती महिलाले ब्यानरमा आफनो तस्बिर राखे पनि नाम भने उल्लेख गरेकी छैनन् । सम्पूर्ण शहिदहरुको तस्विर प्राप्त भएमा यसलाई धार्मिक तिर्थस्थलसँगै राजनैतिक तिर्थस्थलको रुपमा बिकास गर्ने आफ्नो योजना रहेको अधिकारीले बताए । दिप बाल्नका लागि महिनामा १८ लिटर तोरीको तेल आवश्यक पर्ने भएको तर तेल अभाव भएको उनले बताए । उद्योग बाणिज्य संघ सतासीधामका अध्यक्ष मोहन सुबेदीका अनुसार अधिकारी यस ठाउँमा आएपछि नेपाली सेना, प्रहरी र प्रशासनका अधिकारीहरुसँगको सम्पर्कले दोमुखा रहेको मन्दिरको पनि जीर्णोद्धार भएको छ ।कहिले नेपाली सेनाले कहिले, सशस्त्र प्रहरीले यहाँ आएर सरसफाइ र निर्माणका काम पनि गरिदिने गरेको सुबेदीले जानकारी दिए । अर्कोतिर यहाँ मन्दिर बनेपछि पर्यटकिय क्षेत्र घुम्न आउने बहानामा हुनेे गरेका अश्लील गतिविधि पनि नियन्त्रण हुँदै गरेको सुबेदीले जनाए । सन्त अधिकारीले समयमा संबिधान बनाउन नेताहरुलाई सद्धबुद्धि पलाओस् र सत्ता र भत्ताका पछि नकुद्न पनि नेताहरुलाई आग्रह गर्दै आफूले कामना गर्ने गरेको बताए । चेतन