युवा क्रिकेटर फर्किए

काठमाडौ, श्रावण २८ -

नेपाली युवा क्रिकेट टिमको सफलतामा अलराउन्ड प्रदर्शन महत्त्वपूर्ण रहेको प्रशिक्षक जगत टमाटाले बताएका छन् । आयरल्यान्डमा सम्पन्न आईसीसी यू-१९ छनोट प्रतियोगितामा दोस्रो हुँदै स्वदेश फर्केपछि त्रिभुवन अन्तर्राष्ट्रिय विमानस्थलमा शुक्रबार उनले यस्तो प्रतिक्रिया दिएका हुन् ।

उनले टिमले समग्रमा राम्रो प्रदर्शन गरेको बताए । 'राम्रो प्रदर्शन गरेकोमा समग्र टिम र हौसला प्रदान गरेकामा त्यहाँ रहेका गैरआवासीय नेपालीलाई विशेष धन्यवाद दिन चाहन्छु,' टमाटाले भने, 'टिमले अलराउन्ड प्रदर्शन गर्‍यो । आवश्यक परेका बेला सबैले आफ्नो भूमिका निर्वाह गरे ।'

साउन १२ देखि २४ सम्म भएको राउन्ड रोविन लिगमा सहभागी १० देशमध्ये नेपाल दोस्रो भएको थियो । शीर्ष ६ टिमले अर्को वर्ष अस्ट्रेलियाको क्विन्सल्यान्डमा हुने आईसीसी यू-१९ विश्वकपमा स्थान पक्का गरेका थिए । छनोट प्रतियोगितामा स्कटल्यान्डले पहिलो स्थान हात पारेको थियो । त्यस्तै, आयरल्यान्ड, अफगानिस्तान, पपुवा न्युगिनी र नामिबियाले छनोट चरण पार गरेका थिए । नेपाल स्कटल्यान्ड र क्यानडासँग मात्र पराजित भएको थियो ।

'खेलाडीले चोटग्रस्त हुँदाहुँदै पनि उत्कृष्ट प्रदर्शन गरे,' प्रशिक्षक टमाटाले भने, 'हामी उपाधि चुम्नबाट भने चुक्यौं ।' उनले क्यानडाविरुद्धको हारले नेपाललाई उपाधिबाट विमुख गराएको धारणा राखे । क्यानडाविरुद्ध नेपाल ३ विकेटले पराजित भएको थियो ।

'हामी राम्रो खेल्दाखेल्दै पनि त्यस खेलमा हार्न पुग्यौं । विकेटका कारण ब्याटिङ सामान्य रह्यो,' टमाटाले भने, '१ सय ७ रनमात्र पूरा गर्न हाम्रा बलरले क्यानडालाई ४८ ओभर २ बल खेल्न बाध्य बनाए । त्यो आफैंमा प्रशंसायोग्य हो ।'

टमाटाले नेपाली प्रशिक्षकका रूपमा पाएको सफलामा खुसी व्यक्त गर्दै युवा विश्वकपमा राम्रो प्रदर्शन गर्न अहिलेदेखि नै तयारी गर्नुपर्ने विचार राखे । युवा विश्वकपको समूह 'ए' मा नेपालसहित अस्ट्रेलिया, इंग्ल्यान्ड र आयरल्यान्ड छन् । 'धेरैभन्दा धेरै अभ्यास खेलको आवश्यकता छ । यस्तो खेलले अस्ट्रेलियामा राम्रो गर्न मदत पुग्छ,' टमाटाले भने ।

नेपाली टोलीका कप्तान पृथु बाँस्कोटाले 'टिमवर्क' का कारण सफलता हात पारेको बताए । प्रतियोगितामा २१ विकेट लिंदै संयुक्तरूपमा सर्वाधिक विकेट लिने खेलाडी बनेका उपकप्तान राहुलले यसपल्ट ब्याटिङ गर्दै टिमले आवश्यक रन बनाएकाले बलरलाई कम दबाब भएको बताए । उनले एसीसी यू-१९ मा पनि २१ विकेट हात पारेका थिए ।