दिलवहादुर छत्याल, धनगढी, असार,२६- अविरल वर्षाका कारण घर भत्किदा बाजुरामा मार्तडी-६ रापकमा एकै परिवारका सात जना घाइते भएका छन्। घाइतेमध्ये १ जनाको अवस्था गम्भीर छ। बाजुराका प्रमुख जिल्ला अधिकारी प्रेमबहादुर कुँवरका अनुसार शनिबार राति ११ बजेतिर निर्माणाधीन घर भत्कदाँ गोठमा सुतिरहेका ७ जना घाइते भएका हुन्। माथिल्लो तला निर्माण भइरहेको घरको गोठमा सुतेका बेला वर्षाले घर भत्केर ७ जना च्यापिएको उनले बताए। घाइते हुनेमा ५२ वर्षीया गदडी उखेडा,४५ वर्षीया खिजी उखेडा,१५ वर्षीया विस्ना उखेडा १४ वर्षीया कल्पना उखेडा, १३ वर्षीया कञ्चन उखेडा, मावली घरमा बस्दै गरेकी ११ वर्षीया दीपा विक र १० वर्षीय वीरेन्द्र उखेडा रहेका छन्। घाइतेको उपचार जिल्ला स्वास्थ्य कार्यालय बाजुरामा भइरहेको छ। घाइतेमध्ये गम्भीर घाइते भएकी खिजी उखेडालाई जिल्लाबाट अन्यत्र रेफर गरिएको प्रमुख जिल्ला अधिकारी कुँवरले बताए। मार्तडी-८ स्थायी घर भएका उखेडा परिवार मार्तडी-६ रापकमा एक्लो रहेको निर्माणाधीन घर बस्ने भएकाले घटनाको ढिला जानकारी पाएको स्थानिय प्रेम विकले बताए। घटना स्थल जिल्ला सदरमुकाम मार्तडीबाट एक घण्टाको दुरीमा छ। निर्माणधीन अवस्थामा रहेको घर भत्किदा गत सातामात्र बाजुराको बाह्रविसमा एक जना ४ वर्षीया बालकको मृत्यु थियो। बाजुरामा वर्षातले घर भत्किदाँ र पहिरोले च्यापिदाँ असार महिनामा मात्र ३ जनाको मृत्यु भयसकेको प्रजिअ कुँवरले बताए।
source:-नागरिक
Kantipur Fm 
