ब्ल्याकमेलिङ गरेको अभियोगमा सगरमाथा टेलिभिजनका पत्रकार पक्राउ

१३ साउन, राजस्व गस्तीटोलीमा खटिएका जनपद र सशस्त्र प्रहरी टोलीका प्रहरीले सामान जाँचका क्रममा घुस लिँदै गरेको भिडियो रेकर्ड खिचेर प्रहरीबाट रु ५० हजार माग गरेको अभियोगमा झापाका एक टेलिभिजन पत्रकार पक्राउमा परेका छन्। सगरमाथा टेलिभिजनका झापा प्रतिनिधि पुजन घिमिरेलाई बिहीबार अपराह्न विर्तामोडबाट प्रहरीले पक्राउ गरेको हो। उक्त भिडियो खिचेर सशस्त्र प्रहरीका प्रहरी उपरीक्षक विकास अर्यालसित लेनदेनका लागि वार्गेनिङ गरिरहेकाले घिमिरे कारवाहीमा परेको प्रहरीले जनाएको छ। यस विषयमा थप अनुसन्धान भइरहेको प्रहरीले जनाएको छ।     नेपाल पत्रकार महासङ्घ, झापाका अध्यक्ष गणेश पोखरेलले प्रहरीसित पैसा मागिरहेको अवस्थामा पत्रकार घिमिरेको भिडियो खिचेको प्रहरीले आफूलाई जानकारी गराएको बताए। सर्वसाधारणसित पैसा माग गरेर प्रहरीले अपराध गरेको छ भने भिडियो खिचेर समाचार सम्प्रेशन नगरी पैसा मागेर पत्रकार घिमिरेले ठूलो अपराध गरेको देखिएको अध्यक्ष पोखरेलले बताए। काठमाडौँका केही ठूला सञ्चारगृहले पत्रकारिताको मर्म नबुझेका व्यक्तिलाई आफ्ना प्रतिनिधि बनाउने र ‘तलब नदिइ खोजेर खानु’ भनेर पठाउने गरेका कारण यस्ता प्रवृत्ति देखिएको पोखरेलको भनाई छ। पूर्व–पश्चिम राजमार्गअन्तर्गत काँकडभिट्टाको इँटाभट्टामा भारतबाट साइकल र मोटरसाइकलमा सामान ल्याउने सर्वसाधारणसित प्रहरीले पैसा लिइरहेको भिडियो घिमिरेले खिचेका थिए।

source:-पूर्वेली टाईम्स