राखी सावंत जे गर्छिन, त्यसमा ड्रामा नहुने त कुरै हुन्न । राखी चाडै नै ‘गजब देश की अजब कहानिया’ नामक कार्यक्रम लिएर टेलिभिजनमा आउदैछिन भन्ने हल्लाले बलिउड गुञ्जयमान छ । आफ्नो फ्यान तथा दर्शकको प्रेमले आफूलाई टेलिभिजनमा पुनर्गमन गर्न बाध्य भएको बताउछिन् उनी । मौका मिले एक पटक फेरि स्वयंवर गर्ने रहर भएको राखीले खुलासा गरिन् । केहि समयअघि भएको उनको स्वयंवरमा विहेका लागि आउने दुलाहा उम्मेदवारहरुको धुइरो थियो । भारतीय टेलिभिजनबाट लाइभ प्रसारित उक्त कार्यक्रममा राखीले अन्ततः आफ्नो जीवन साथी पनि चुनेकी थिइन् । तर पछि नाटकियरुपमा आफ्नो निर्णय बदल्दै उनले बिहे गर्न इन्कार गरिन् । इन्गेजमेन्ट भए पछि पनि बिहे तोड्नु भयो नि भन्ने प्रश्न गर्दा राखीले भनिन्- ‘स्वयंवरमा भाग लिने सबै पुरुषहरु नायक बन्न चाहन्थे । मैले बिहे गर्न रोजेको दुलाहा त ‘गे’ पो रहेछन् ।’ बिहेकै प्रसङ्गमा राखीले आफूलाई शिल्पा शेट्टीसँग तुलना गर्दै राहुल गान्धीजस्तो ब्यक्तित्वसँग विवाह गर्ने रहर भएको बताइन् । शिल्पालाई हट र हृयान्सम केटा मिल्छ भने आफूलाई नमिल्ने भन्ने कुनै कारण नभएको उनले थपिन् । शिल्पा झै सुन्दरी बन्न १५ के.जी. तौल समेत घटाएको राखीले बताइन् । केहि दिन अघि एक टेलिभिजन कार्यक्रममार्फत राखीले राहुल गान्धीसँग बिहे गर्ने इच्छा भएको लाइभ घोषणा गरेकी थिइन् । भारतको भावी प्रधानमन्त्रीरुपमा समेत हेरिएको राहुल गान्धीले भने यसमा कस्तो प्रतिक्रिया दिन्छन्, आगामी दिनले नै देखाउला ।
source:-onlinekhabar
Kantipur Fm 
