तेहरान, १५ जेठ : बालिकालाई बलात्कार गर्ने दुई जना दोषीलाई आज इरानमा एक सार्वजनिकस्थलमा झुन्डाएर मृत्युदण्ड दिइएको समाचार छ । इरानको सरकारी समाचार समिति इर्नाले आज जनाएअनुसार पी मोहम्मदी पास्तेरीजाह र ए नमाकी नामका ती दुईजनालाई आज इरानको पश्चिमी सहर केरमान्साहको एक सार्वजनिकस्थलमा झुन्डाइएको हो । एकजना नौ वर्षीया बालिकालाई बलात्कार गरेको आरोप ती दुईजनामाथि लागेकामा अदालतबाट प्रमाणित भएपछि उनीहरूलाई यो सजाय दिइएको हो । मृत्युदण्डका लागि ती दुईजनालाई झुन्डाउन ल्याइँदा सो स्थानमा निकै ठूलो सङ्ख्याका नागरिकले हेरिरहेका थिए । उनीहरूले न्यायालयलाई धन्यवाद भनेर नाराबाजी पनि गरिरहेका थिए । एएफपीको एक तथ्याङ्क अनुसार सन् २०११ मा मात्र कम्तीमा पनि १४५ जनालाई इरानमा मृत्युदण्डको सजाय दिइएको छ । इरानले सो देशमा न्याय व्यवस्था र शान्तिसुरक्षा कायम राख्नका लागि मृत्युदण्डको कानुन आवश्यक रहेको बताउने गरेको छ ।
by mechikali.
Kantipur Fm 
