काठमाडौं, चैत्र ११ - प्रहरीले राजधानीको बाडभन्ज्याङबाट १ टनभन्दा बढी लागूपदार्थ चरेससहित दस जनालाई पक्राउ गरेको छ । लागूऔषध कानुन कार्यान्वयन इकाइ नयाँ बानेश्वरले १ हजार २ सय ४० किलो चरेससहित मकवानपुर र पर्साका उनीहरूलाई पक्राउ गरेको हो ।
इकाइका एसएसपी देवेन्द्र सुवेदीका अनुसार पक्राउ पर्नेमा मकवानपुरका गोपाल कार्की, पर्साका हीरा रावत, अनिलकुमार दास र विजयकुमार साह छन् । काठमाडौंको बाडभन्ज्याङ गाविसमा लुकाइराखेको अवस्थामा प्रहरीले चरेस बरामद गरेको थियो । प्रहरीले मकवानपुर र धादिङमा लागूऔाषध संकलन गरेर हेटौंडा-पथलैया हुँदै भारतमा पुर्याउने अनुमान गरेको छ । 'विभिन्न नाकाबाट भारतको मधुवन जिल्लामा पुर्याएर कारोबार गर्ने गरेको पाइएको छ,' एसएसपी सुवेदीले भने, 'संगठित गिरोह सक्रिय भएर कारोबार गरेको छ ।'
यही समूहसँग मिलेर कारोबार गर्ने अर्को समूह पनि पक्राउ परेको छ । नेपाल र भारतमा लागूऔषधको कारोबारका मुख्य नाइके भारतीय नागरिक रञ्जित सिंहसहित तीनजना समातिएका छन् । भारतीय नम्बर प्लेटको गाडीमा फल्स बटम बनाएर बिक्री गर्न काठमाडौं ल्याइरहेको अवस्थामा प्रहरीले भारत उत्तरप्रदेशका सिंहसहित अरुणकुमार यादव र अभिनाश मिश्रलाई पक्राउ गरेको जनाएको छ । प्रहरीले उनीहरूको साथबाट २ सय किलो चरेससमेत बरामद गरेको छ ।
उनीहरूको यूपी ७६ एफ २०५१ नम्बरको टाटा स्पाको गाडीसमेत बरामद गरेको छ । उक्त गाडीमा फल्स बटम बनाएर लागूपदार्थ लुकाइएको थियो । प्रहरीले उक्त गाडी लागूऔषधको कारोबारकै मुख्य प्रयोजनका लागि बनाइएको समेत दाबी गरेको छ । 'लागूऔषध वा हातहतियार लुकाउन मिल्ने गरी फल्स बटमहरू बनाइएका छन्,' एसएसपी सुवेदीले भने ।
नाइके सिंह लागूऔषध कानुन कार्यान्वयन इकाइले खोजी गरिरहेका मोस्ट वान्टेडसमेत रहेको प्रहरी दाबी छ । 'सिंह वीरगन्जबाट भारतको रक्सौल फरिदावाद, कानपुर, आग्रा र गोवामा लागूऔषध पुर्याउने व्यक्ति हुन्,' सुवेदीले भने ।
यस्तै मकवानपुरमा गाँजा उत्पादन गरेर भारतीय बजारमा बिक्री गर्ने धनबहादुर गोले पक्राउ परेका छन् । उनलाई एक सय असी किलो चरेससहित प्रहरीले पक्राउ गरेको हो । उनी पनि लागूऔषध कानुन कार्यान्वयन इकाइले लामो समयदेखि खोजी गर्दै आएका मुख्य व्यक्ति हुन् । धादिङमा लागूऔषध चरेसको कारोबार गर्ने विजय तामाङ र रमेश तामाङ ५० किलो चरेससहित समातिएका छन् ।
Kantipur Fm 
0 commentaires