११ चैत्र, ललितपुर । नेपाल, भारत र नेदरल्याण्डबीच आयुर्वेद अस्पताल निर्माण गर्ने विषयमा सम्झौता भएको छ । बिहीबार नेपालका तर्फबाट हिमालयन मेडिकल कलेज अफ साइन्सका डा रत्नकमल वैद्य, नेदरल्याण्डका तर्फबाट डा राजा किन्ले ब्रुक र भारतका तर्फबाट डा आनन्द श्रीवास्तवले सोसम्बन्धी सम्झौतामा हस्ताक्षर गर्नुभयो ।
परम्परागत आयुर्वेद चिकित्सालाई एक अर्का देशबीच सहकार्य गरी आधुनिकीकरण गर्ने उद्देश्यले मङ्गलबारदेखि सुरु भएको अन्तर्राष्ट्रिय आयुर्वेद गोष्ठीमा आयुर्वेद चिकित्सासम्बन्धी विद्यार्थी र प्राध्यापकसँगको ज्ञान आदानप्रदान गर्न विभिन्न कार्यक्रमको आयोजना गर्ने सहमति भएको छ । यसैगरी आयुर्वेद चिकित्सा पद्दतिलाई प्रयोगमा ल्याउनका लागि पनि यी संस्थाबीच समन्वय रहने बताइएको छ । उक्त गोष्ठीमा नेपालका ४० र भारत तथा संयुक्त राज्य अमेरिकाका एक-एक गरी ४२ आयुर्वेदविज्ञको सहभागिता रहेको थियो ।
कार्यक्रमका संयोजक दीपकप्रकाश बाँस्कोटाले नेपालका जडीबुटीको प्रयोग गरी निर्माण गरिएको आयुर्वेदिक औषधिको उत्पादन गर्ने उद्योगलाई प्रोत्साहन गरिने बताउनुभयो । हाल प्रयोगमा आउने एलोपेथिक औषधिबाट मानिसमा साइड इफेक्ट हुनसक्ने भएकाले परम्परागत आयुर्वेद औषधि प्रयोग गर्न आम जनतालाई सचेतना फैल्याउन जरुरी भएको बताइएको छ । रासस









0 commentaires