बेलायती मन्त्री आउँदै, पूर्व गोर्खाको पेन्सन बढ्ने

काठमाडौ, चैत्र ९ - सुरक्षाकर्मीहरुको कल्याण सम्बन्धी बेलायती मन्त्री अन्ड्रु रोवदनले आफ्नो नेपाल भ्रमणका क्रममा पूर्व गोर्खाहरुले पाउँदै आएको पेन्सनमा बृद्धिको घोषणा गर्ने भएको छ । बेलायती दूतावासका अनुसार उनको एक साता लामो भ्रमणका क्रममा गोर्खा पेन्सन स्किम अनुसार दिइने पेन्सनमा बृद्धिको घोषणा हुन लागेको हो । 'बढोतरीले बेलायत सरकारको पूर्व गोर्खाहरुप्रतिको निष्पक्ष तथा उचित स्किमको प्रतिबद्धतालाई उजागर गर्नेछ' दूतावासले बिहीबार जारी गरेको बिज्ञप्तिमा भनिएको छ । त्यसअघि मन्त्री रोवदनले गोर्खा वेलफेर स्किम अन्तरगत भइरहेका विकास सम्बन्धी बिभिन्न गतिविधिहरुका साथै गोर्खा पेन्सनरहरुसंग पनि भेटघाट गर्ने छन् । दूतावासका अनुसार उनले बिहीबारदेखि बुधबारसम्म नेपालको भ्रमण गर्नेछन् । सन् २०१० को मे मा मन्त्री भएका उनको यो पहिलो नेपाल भ्रमण हो । लामो समयदेखिको योजनाबद्ध यो भ्रमणबाट उनले बेलायती रक्षा तथा कल्याणकारी गतिविधिहरु र यहँका पूर्व गोर्खाहरुको कल्याण सम्बन्धी विषयहरु थाहा पाउने अपेक्षा लिइएको पनि दूतावासले जनाएको छ । उनलाई नेपालको शान्ति प्रकृयामा बेलायतले गर्दै आएको सहयोगलाई बृद्धी गर्न पनि प्रतिबद्ध रहेकोसमेत उल्लेख गरिएको छ । उनले रक्षा मन्त्री बिष्णु पौडेल, परराष्ट्र सचिव मदन भट्टराई र सेनापति छत्रमानसिंह गुरुङसंग भेट्ने कार्यक्रम रहेको पनि बिज्ञप्तिमा उललेख छ ।

source:-ekantipur